Qashqadaryoda Damas haydovchilarining hujjati olib qo‘yilib, paxtaga odam tashishga majbur qilingani aytilmoqda

Qashqadaryo viloyatining Koson tumanidan Qarshi shahriga yo‘lovchi tashuvchi Damas haydovchilarining shikoyat qilishicha, tuman YPX inspektorlari haydovchilarning hujjatini olib qo‘yib, har kuni paxtaga bepul hasharchi tashishga majbur qilayotgani aytilmoqda.

Haydovchilar shikoyatini o‘rgangan “Daryo” muxbiri Otabek Qo‘ldoshevning yozishicha, “Nasaf audio-video” MChJ rahbarligidagi uyushmaga a’zo bo‘lgan “Qarshi—Koson”, “Koson—Qarshi” yo‘nalishida harakatlanuvchi 44 ta Damas avtomobillarining texnik pasporti Koson tuman yo‘l harakati xavfsizligi bo‘limi inspektorlari Akrom Avazov hamda Shahboz Qo‘chqorovlar tomonidan olib qo‘yilgan.

“Ayni kunda Qarshidan Kosonga qatnovchi Damas haydovchilarining 50—60 foiz haydovchisida avtomobilining texnik pasporti yo‘q. Boisi, ‘GAI’ olib qo‘ygan. Va har kuni bir marotaba paxtaga odam olib borish majburiyatini yuklagan”, — deydi haydovchi Mohir Salomov.

“Koson—Qarshi”, “Qarshi—Koson” yo‘nalishidagi haydovchilar faoliyatini nazorat qiluvchi uyushma “Nasaf audio-video” MChJ ish yurituvchisi Mavjuda Uvayevaning tasdiqlashicha, ushbu yo‘nalishga a’zo Damas avtomobillarining aksariyati YPX inspektorlarining paxtaga bepul odam tashish talabini bajarishga majbur.

Mardon To‘xtayev ismli haydovchining “Daryo” muxbiriga aytishicha, unga tegishli avtomobilning texnik pasportini paxta mavsumi boshlangan payt inspektor Akrom Avazov olib qo‘ygan va haligacha qaytarib bermagan.

Haydovchi Erkin Boboxonov esa hujjati Shahboz Qo‘chqorov ismli YPX xodimi tomonidan olib qo‘yilganligini aytib, xodim tomonidan xizmatga majburlanayotganini aytmoqda.

“Daryo” muxbiri bilan telefon orqali muloqotga kirishgan YPX xodimi Shahboz Qo‘chqorov muxbir savolini eshitgach, “yo‘q bunday qilmaganman” deya telefonni o‘chirdi. Va qaytib xodimga ulanolmadik.

Damas’chilarning majburiy tarzda paxtaga odam tashishini rad etgan Koson tuman Yo‘l harakati xavfsizligi bo‘limi boshlig‘i Shuhrat Xolmatovning aytishicha, Damas haydovchilarining paxtaga odam tashishi bor gap. Ammo buning uchun ularga haq to‘lanadi. Shuhrat Xolmatovga ko‘ra, bunday vaziyat yuzaga kelishiga yo‘nalishni tartibga soluvchi uyushma mas’ullari aybdor.

“Paxta tozalash zavodi, fermer hamda uyushma kelishuviga ko‘ra, uch tomonlama shartnoma imzolanib, o‘sha shartnomaga muvofiq Damas haydovchilari fermerlarga xizmat ko‘rsatishi belgilangan. Sentabr oyi boshida o‘tkazilgan yig‘ilishda shunday to‘xtamga kelingandi. Shartnoma tuzilgach, Damas haydovchisi hasharchini tashish uchun qancha masofa bosganini fermerdan tasdiqlatgach, paxta tozalash zavodi tomonidan yo‘l haqi to‘lab beriladi. Haydovchilari huquqi poymol bo‘lmaydi”, — deydi Shuhrat Xolmatov.

Ma’lum qilinishicha, sentabr oyi boshida paxta tozalash zavodlari, uyushmalar va fermerlar ishtirokida yig‘ilish o‘tkazilgan. Yig‘ilishda Damas haydovchilarining xizmatiga shartnoma asosida pul to‘lash nazarda tutilgan va shartnoma imzolash mas’uliyati uyushma boshliqlariga yuklatilgan.

Shuhrat Xolmatovning ma’lumot berishicha, o‘sha yig‘ilishda ayni kunda hujjatlari olib qo‘yilgani aytilayotgan Damas’lar uyushmasi mas’ullari ham ishtirok etgan.

“Nasaf audio-video” MChJ ish boshqaruvchisi Mavjuda Uvayeva bunday shartnomadan xabari yo‘qligini aytmoqda.

Koson tuman Yo‘l harakati xavfsizligi bo‘limi boshlig‘i Shuhrat Xolmatov “Daryo” muxbiri bilan suhbati so‘ngida “Agar xodimlarimiz anglashilmovchilik sabab biror bir haydovchining hujjatini olishgan bo‘lsa, albatta bugunoq qaytarib beradi” dedi. Bundan kelib chiqadiki, ayrim haydovchilarining hujjati olib qo‘yilgani bor gap.Nima uchun va qaysi asosga ko‘ra? “Daryo” mas’ullardan izoh kutadi.