Tojikistonda pul o‘tkazmalari bo‘yicha Yagona protsessing markazi faoliyatini boshladi. Bu haqda mamlakat Milliy banki xabar bermoqda.
Mazkur tizimni ishlab chiqish va joriy etish bilan shug‘ullangan Milliy bank raisining o‘rinbosari Jamoliddin Nuraliyevga ko‘ra, YaPM pul o‘tkazmalari iste’molchilari manfaatini himoya qilishi ko‘zda tutilgan.
Uning aytishicha, oldinlari tojikistonliklar mamlakatning barcha banklari ham ayrim to‘lov tizimlari bilan to‘g‘ridan to‘g‘ri shartnomaga ega bo‘lmagani uchun istalgan bankida pul o‘tkazmalarini ololmagan. Shuningdek, turli to‘lov tizimlari bilan ishlagan banklar ularning har biri uchun alohida hisob raqam ochishga majbur bo‘lgan. Bu esa qo‘shimcha moliyaviy xarajatlar, vaqt va tavakkalchilikka olib kelgan.
Xavf-xatarlardan yana biri xorijiy to‘lov tizimlari tomonidan tojik banklari to‘lab bergan pul o‘tkazmalari qoplanmagani bilan bog‘liq. Nuraliyev bankrotlik tufayli Tojikiston banklariga hozirgacha 1 million dollar va 45 million rubl to‘lamay kelayotgan “Lider” tizimini bunga misol tariqasida keltirdi.
“YaPM bu va boshqa salbiy holatlarni bartaraf etish bilan shug‘ullanadi. Markaz mijozlar va pul o‘tkazmalari xizmatlari bozori ishtirokchilari uchun o‘ziga xos kafolatga aylanadi”, — dedi Jamoliddin Nuraliyev.
Izoh (0)