“A” guruhi
Birinchi turda Parijda yirik hisobda mag‘lub bo‘lgan “Real” bu safar o‘z maydonida guruh autsayderi deb hisoblayotgan “Bryugge”ni qabul qildi. O‘yin bir qarashda madridliklar uchun oson o‘tishi taxmin qilingandi, biroq tanaffusga qadar belgiyaliklar barcha bashoratlarni yo‘qqa chiqardi. 9-daqiqada Emmanuel Bonaventure Dennis chap qanotdan tashkil qilingan hujumni muvaffaqiyatli yakunladi. Nigeriyalik futbolchi Tibo Kurtua bilan birga-bir vaziyatga chiqib bordi va noqulay holatga tushib qolganiga qaramay darvozani ishg‘ol qildi. Shundan keyin maydon egalari vaziyatni o‘nglashga urindi, biroq Luka Modrichning qo‘pol xatosi ikkinchi golga olib keldi. Yana Dennis yakkama-yakka vaziyatga chiqib borib, Kurtuani dog‘da qoldirdi. Tanaffusda Zinedin Zidan jarohat olgan Nacho o‘rniga Marselo, Kurtua o‘rniga esa Areolyani maydonga tashladi. Ispan OAV Kurtua bosh aylanishi va qornidagi og‘riq sabab zaxiraga olinganini ta’kidladi. Nacho esa ikki yarim oyga safdan chiqqani aytilmoqda.
Ikkinchi bo‘limda mehmonlar e’tiborni himoyaga qaratdi va birinchi taymdagidan farqli o‘laroq, qarshi hujumlarga kam chiqdi. 56-daqiqada Karim Benzema tomonidan uzatilgan to‘pni Serxio Ramos boshi bilan darvozaga aniq yo‘naltirdi. Dastlab gol ofsayd tufayli inobatga olinmadi, biroq videotakrorlardan keyin hisob qisqargani qayd etildi. O‘yin yakunlanishi arafasida Kazemiro jarimadan oshirib berilgan to‘pni boshi bilan chiroyli aylantirgan holda mehmonlar darvozasiga joylab qo‘ydi. Shu tariqa “Real” Chempionlar Ligasida ketma-ket uchinchi uy o‘yinida g‘alabaga erisha olmadi.
Guruhning ikkinchi bahsida PSJ Istanbulda “Galatasaroy” bilan o‘ynadi. Mazkur bahsda parijliklar Mauro Ikardining ikkinchi bo‘lim avvalida urgan goli evaziga g‘alabaga erishdi. Argentinalik futbolchining PSJdagi debyut goli jamoaga muhim uch ochkoni taqdim etdi.
2-turdan so‘ng PSJ yuz foizlik natija bilan guruh peshqadamligini o‘z qo‘liga olgan. Undan keyin ikkita durang qayd etgan “Bryugge” bormoqda. “Galatasaroy” va “Real” (1 ochkodan) oxirgi pog‘onalarni bo‘lishib turibdi.“B” guruhi
Seshanba oqshomining markaziy o‘yini Londonda bo‘lib o‘tdi. Musobaqaning amaldagi vitse-chempioni “Tottenhem” “Bavariya”ni qabul qildi. Dastlab mezbonlar Son Hyon Minning golidan keyin oldinga o‘tib olgan bo‘lsa, uning ortidan ketma-ket “zarba”larni qabul qilib oldi. Myunxenliklarning darvoza tomon aniq yo‘llagan har ikki zarbasidan bittasi golga aylanaverdi. Bir paytlar “shporlar”ning azaliy raqibi hisoblanmish “Arsenal”da to‘p surgan Serj Gnabri pokerga erishdi. Robert Levandovski dubl qayd etgan bo‘lsa, yana bir golga Yozua Kimmix muallif bo‘ldi. Shu tariqa Maurisio Pochettino shogirdlari yangi stadiondagi eng yirik mag‘lubiyatni qabul qilib oldi.
Parallel bo‘lib o‘tgan bahsda “Srvena Zvezda” o‘zida “Olimpiakos” ustidan irodali g‘alabani qo‘lga kiritdi. Birinchi bo‘limda greklar hisobda oldinga o‘tib oldi, biroq ikkinchi taym avvalidagi chetlatish o‘yinni butkul o‘zgartirib yubordi. 62-daqiqada muvozanatni tiklagan serbiyaliklar so‘nggi daqiqalarda ikkita gol urib g‘alabani raqibidan tortib oldi.
Shu tariqa “Bavariya” 6 ochko bilan birinchi o‘rinda turibdi, “Srvena Zvezda” esa (3 ochko) bu g‘alabadan keyin ikkinchi o‘ringa ko‘tarildi. “Tottenhem” va “Olimpiakos” 1 ochkodan to‘plagan.“C” guruhi
Guruh favoriti “Manchester Siti” o‘z maydonida Zagrebning “Dinamo”si bilan uchrashdi. Bu o‘yinda mankunianlar vaziyatlardan unumli foydalanishda oqsadi, biroq shunday bo‘lsa-da, yakuniy natija Pep Gvardiola jamoasi uchun qoniqarli bo‘ldi. O‘ziga xos jihati bu o‘yinda “Siti” asosiy tarkibidan ingliz futbolchisi o‘rin olmadi va bunaqasi “shaharliklar” ijrosida 2013-yildan keyin ilk bor kuzatildi. Biroq uchrashuvdagi ikkita golga zaxiradan qo‘shilgan angliyalik futbolchilar mualliflik qildi. Rahim Sterling maydonga tushganidan o‘n daqiqa o‘tib o‘z hisobiga gol yozdirib qo‘ygan bo‘lsa, Filip Foden uchun to‘rt daqiqa kifoya qildi.
Guruhdagi ikkinchi o‘yinda “Atalanta” va “Shaxtyor” jamoalari o‘zaro to‘qnash keldi. Bu bahs bergamoliklar uchun omadsiz yakunlandi. Avvaliga Yosip Ilichich 16-daqiqada penaltidan foydalana olmadi, shunday bo‘lsa-da biroz o‘tib Duvan Sapata italyanlarning birinchi golini urdi. Tanaffus arafasida ukrainlar hisobni tenglashtirdi. Barchasi murosa tomon ketayotgan paytda “Shaxtyor” vakillari 95-daqiqada gol urib, raqibdan g‘alabani yulib oldi.
Guruhda “Manchester Siti” (6 ochko) birinchi o‘rinda qoldi, “Dinamo” va “Shaxtyor” uch ochkodan to‘plagan holda keyingi pog‘onalarda bormoqda. Ikkita turda ochko to‘play olmagan “Atalanta” so‘nggi o‘rinni band qilib turibdi.“D” guruhi
“Yuventus” Turinda “Bayer”ni qabul qildi. Unda Gonsalo Iguain, Federiko Bernardeski va Krishtianu Ronalduning gollari “keksa sinyora”ga g‘alaba olib keldi. Mauritsio Sarri shogirdlari hujumdagi samaradorlikdan tashqari mudofaa chizig‘ida ham ishonchli harakat qildi. Nemislar maydon egalari darvozasi tomon biror marta aniq zarba yo‘llay olmadi.
Guruhning narigi o‘yinida “Atletiko” Moskvaga safar qildi va “Lokomotiv” bilan o‘ynadi. O‘tgan turda “Bayer”ni dog‘da qoldirgan “temiryo‘lchilar” bu o‘yinda ham nomdor jamoaga qarshi munosib qarshilik qildi. Biroq darajadagi ustunlik o‘z so‘zini aytdi va “matraschilar” ikkinchi bo‘lim boshida ikkita gol urgan holda o‘yin masalasini hal qilib qo‘ydi.
Guruhda “Yuventus” va “Atletiko” 4 ochkadan jamg‘argan holda peshqadam bo‘lib turibdi. “Lokomotiv” hisobida 3 ochko bo‘lsa, “Bayer” hali ochko qo‘lga kirita olmadi.
Qiziqarli faktlar va statistika
- Krishtianu Ronaldu YChLdagi g‘alabalari soni (102 ta) bo‘yicha Iker Kasilyasni ortda qoldirib rekord o‘rnatdi
- Ronaldu YChLda o‘zi duch kelgan raqiblarga (33 klub) gol urish bo‘yicha Raulning rekordini takrorladi
- Serj Gnabri 2015-yildan beri YChLda pokerga erishgan ilk futbolchiga aylandi. So‘nggi bor musobaqa doirasida Ronaldu “Real” safida 2015-yil “Malmyo”ga qarshi o‘yinda 4 ta gol urgandi
- Joau Feliks “Atletiko Madrid” safida YChLda gol urgan eng yosh (19 yosh 325 kunlik) futbolchiga aylandi
- “Real” tarixda ilk bor YChL startidagi ikki o‘yinda g‘alaba qozona olmadi
- Harri Keyn Chempionlar Ligasida gol urish bo‘yicha (16 ta) Devid Bekhemga tenglashib oldi
- Serxio Ramos himoyachilar orasida YChLda eng ko‘p o‘yin (120 ta) o‘tkazish bo‘yicha Roberto Karlosga yetib oldi
YChL
2-tur bahslari
1-oktabr, seshanba
“A” guruhi
“Real”—“Bryugge” 2:2
Gollar: 0:1 — 9 Bonaventure, 0:2 — 39 Bonaventure, 1:2 — 55 Ramos, 2:2 — 85 Kazemiro“Galatasaroy”—PSJ 0:1
Gol: 0:1 — 52 Ikardi“B” guruhi
“Tottenhem”—“Bavariya” 2:7
Gollar: 1:0 — 12 Son Hyon Min, 1:1 — 15 Kimmix, 1:2 — 45 Levandovski, 1:3 — 53 Gnabri, 1:4 — 55 Gnabri, 2:4 — 61, penalti Keyn, 2:5 — 83 Gnabri, 2:6 — 87 Levandovski, 2:7 — 88 Gnabri“Srvena Zvezda”—“Olimpiakos” 3:1
Gollar: 0:1 — 37 Ruben Semedu, 1:1 — 62 Vulich, 2:1 — 87 Milunovich, 3:1 — 90 Boachi“C” guruhi
“Atalanta”—“Shaxtyor” 1:2
Gollar: 1:0 — 28 Sapata, 1:1 — 41 Morayes, 1:2 — 90 Solomon“Manchester Siti”—“Dinamo Zagreb” 2:0
Gollar: 1:0 — 66 Sterling, 2:0 — 90 Foden“D” guruhi
“Yuventus”—“Bayer” 3:0
Gollar: 1:0 — 17 Iguain, 2:0 — 61 Bernardeski, 3:0 — 88 Ronaldu“Lokomotiv M”—“Atletiko” 0:2
Gollar: 0:1 — 48 Joau Feliks, 0:2 — 58 TomasYanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)