Farg‘ona viloyatining Yozyovon, Qo‘shtepa va Rishton tumani respublikada birinchilardan bo‘lib, 15 ish kunida paxta topshirish shartnomaviy rejasini bajardi, deb xabar bermoqda O‘zA.
Viloyatda joriy yilda 82,1 ming gektar maydonda chigit qadab, mo‘l hosil yetishtirildi. Hududda paxta yig‘im-terimi ishlarini uyushqoqlik bilan o‘tkazish maqsadida 1 370 ta terim otryadi tashkil etilib, 215 200 nafardan ortiq terimchi ixtiyoriy paxta yig‘ishtirib olishda ishtirok etmoqda.
O‘tgan yili Rishton tumanida “Rus—O‘zbek teks” mas’uliyati cheklangan jamiyatida innovatsion loyiha asosida paxta yetishtirishda birinchi marta klaster usuli qo‘llanilib, yuqori hosil olindi. Joriy yilda esa viloyatdagi 9 ta tumanda paxta-to‘qimachilik klasteri tashkil etilib, fermer xo‘jaliklari bilan shartnoma tuzilgan.
Yozyovon tumani paxtakorlari davlatga 14,8 ming tonna paxta topshirib, belgilangan rejani bajardi.
Qo‘shtepa tumanida Fergana Global textile mas’uliyati cheklangan jamiyati tomonidan 7,24 ming gektar maydonda birinchi marta klaster asosida paxta yetishtirildi. Tuman paxtakorlari davlatga 19,9 ming tonna paxta topshirib, shartnomaviy rejani bajardi. 165 ta fermer xo‘jaligi bilan shartnoma tuzilgan bo‘lib, ularning aksariyati paxta rejasini ortig‘i bilan bajardi.
Rishton tumani ham 5,95 ming gektar yer maydonida 15,9 ming tonna paxta yetishtirib, belgilangan shartnomani bajardi. “Rus—O‘zbek teks” mas’uliyati cheklangan jamiyati joriy yilda ham mo‘l hosil olish tadbirlarini ko‘rdi. O‘rtacha hosildorlik har bir gektarga 30 sentnerni tashkil etdi.
Izoh (0)