Toshkent viloyatining Bekobod shahrida yashovchi Jo‘rayevlar xonadonida, bir yo‘la 4 nafar egizak farzand dunyoga keldi. Bu haqda Sog‘liqni saqlash vazirligi jamoatchilik bilan aloqalar bo‘limi xabar berdi.
O‘tgan yili turmush qurgan Shoira Jo‘rayeva Bekobod shahridagi farmatsevtika zavodida kichik xodim, Bekzod Jo‘rayev esa O‘zbekiston metallurgiya kombinatida injener.
“Quvonchimni, hayajonimni hech qanday so‘z bilan izohlay olmayman. Dastavval 4 nafar egizak kutayotganimni eshitganimda ham xursand bo‘ldim, ham qo‘rqdim. Shifokorlardan minnatdorman. Men bilan yelkama-yelka turib, yaqin jigarlaridek g‘amxo‘rlik ko‘rsatishdi. Farzandlarim eson-omon tug‘ilishida yordam berishdi”, — deydi baxtiyor ona Shoira Jo‘rayeva.
Shifokorlarning tajribasi sabab erta tug‘ruqning oldi olinib, tug‘ruqni 34 haftaga olib borishga erishildi. Bolalarni sog‘-salomat ona qo‘liga topshirish chora-tadbirlarini belgilash maqsadida odatdagidek markaz direktori, o‘rinbosari hamda barcha mutaxassislar ishtirokida tug‘ruq rejasi tuzilgan. Tug‘ruq jarayoni uchun barcha zamonaviy apparatlar shay holatga keltirilib, 21-sentabr kuni ayol jarrohlik amaliyotiga rejali ravishda olingan.
Tug‘ruqning asoratsiz o‘tishi uchun jarrohlik amaliyoti so‘nggi perenatal texnologiyalar bo‘yicha olib borilgan. “Salkam bir soat davom etgan jarayonda barcha xodimlar birdek jonbozlik ko‘rsatdi. Operatsiya muvaffaqiyatli kechdi. Hozirda chaqaloqlarning uch nafari intensiv bolalar bo‘limida. Bir nafarining ahvoli e’tibortalab bo‘lgani uchun chaqaloqlar reanimatsiyasi bo‘limida kuzatuv va intensiv davolash jarayonida”, — deyiladi xabarda.
Onaning ahvoli ancha yaxshi. U operatsiya stolidayoq to‘rt nafar bolasi, ya’ni ikki nafar o‘g‘il va ikki nafar qizaloqni bag‘riga olgan.
Izoh (0)