AQSH Davlat departamenti 26-mart kuni ukrainalik bolalarni aniqlash, vataniga qaytarish va reabilitatsiya qilishni qo‘llab-quvvatlash uchun 25 million dollar miqdorida yangi yordam paketi ajratilishini e’lon qildi. Bu haqda departament rasmiy saytida ma’lum qilindi.

Ma’lumotlarga ko‘ra, ushbu mablag‘lar o‘z uylaridan majburan olib ketilgan bolalarni qidirish va kuzatish dasturlarini moliyalashtirishga yo‘naltiriladi. Shuningdek, ajratilgan yordam Ukraina hukumati va mahalliy hamkorlarga qaytib kelgan bolalarga g‘amxo‘rlik qilishda ko‘mak beradi.
Hozirda AQSHda bo‘lib turgan Ukraina birinchi xonimi Yelena Zelenskaya ukrainalik bolalarni ozod qilish masalasida faol targ‘ibot olib bormoqda. Safar davomida u Davlat departamenti rasmiylari bilan uchrashdi va AQSH ma’muriyati hamda Kongressiga ushbu masalani ustuvor vazifa deb bilgani uchun minnatdorchilik bildirdi.
“Har bir raqam ortida bola, oila va tiklanishni kutayotgan hayot turibdi. Har bir ukrainalik bola uyiga qaytishi shart”, deb yozdi Zelenskaya o‘zining X ijtimoiy tarmog‘idagi sahifasida.

Prezident Vladimir Zelenskiy homiyligida tashkil etilgan, Rossiyaga olib ketilgan yoki bosib olingan hududlarda qolib ketgan bolalarni xavfsiz hududlarga qaytarishga qaratilgan Bring Kids Back UA loyihasi 26-mart kuni o‘z hisobotini e’lon qildi. Ma’lum bo‘lishicha, shu vaqtgacha 2000 dan ortiq bola qaytarilishiga erishilgan.
Biroq muammoning ko‘lami ancha keng: hozirda Ukraina hukumati deportatsiya qilingan va majburan ko‘chirilgan bolalar bilan bog‘liq 20 570 ta holat bo‘yicha surishtiruv ishlarini olib bormoqda.
Mart oyi boshida BMT tomonidan o‘tkazilgan tekshiruv natijalarida Rossiyaning 2022-yildagi keng ko‘lamli bosqinidan beri ukrainalik bolalarning majburan ko‘chirilishi insoniyatga qarshi jinoyat deb baholandi.
Rossiya tomoni esa ukrainalik bolalarni o‘g‘irlash haqidagi ayblovlarni bir necha bor rad etgan. Moskva ushbu harakatlarni bolalarni jangovar harakatlardan himoya qilish va ularning xavfsizligini ta’minlash chorasi sifatida talqin qilib kelmoqda.