Markaziy Amerikadagi to‘rtta davlat avariya sabab elektr energiyasiz qoldi

Gonduras, Gvatemala, Nikaragua va Salvador elektr ta’minotida yuz bergan nosozlik sabab to‘liq yoki qisman elektr energiyasiz qoldi. Bu haqda Gonduras energetika kompaniyasiga tayanib, “Kommersant” xabar berdi.

Kompaniya ma’lumotlariga ko‘ra, global nosozlik Nikaragua hududida sodir bo‘lgan avariya sabab yuzaga kelgan. Mintaqaning barcha mamlakatlari yagona elektr uzatish tarmog‘i bilan birlashgan. Hozirda mamlakatlarning elektr ta’minotini tiklash bo‘yicha ishlar olib borilmoqda.

Joriy yil boshidan buyon Markaziy Amerika davlatlarida bir necha bor elektr energiyasida uzilishlar kuzatilgan. Ayniqsa, Venesuela hududida avariyalar ko‘p sodir bo‘lgan. Venesueladagi yirik GESda yuz bergan nosozlik sabab mamlakat elektr energiyasiz qolganidan so‘ng, Karakas sodir bo‘lgan voqeani terakt deb atagan va unda AQShni ayblagan edi.