Qishloq xo‘jaligi vaziri Jamshid Xo‘jayev: Fermerlarga yer berish huquqi hokimlardan olib qo‘yiladi

Jamoatchilik muhokamasi uchun e’lon qilingan Qishloq xo‘jaligini rivojlantirishga qaratilgan 10 yillik strategiya loyihasiga ko‘ra, 2020-yildan boshlab yerdan foydalanishga bo‘lgan huquq hokimlar tomonidan belgilanmaydi. Bu haqda qishloq xo‘jaligi vaziri Jamshid Xo‘jayev jurnalistlar bilan bo‘lib o‘tgan uchrashuvda aytib o‘tdi, deya xabar bermoqda “Daryo” muxbiri Musulmonbek Ibrohimov.

Uchrashuvda vazir Jamshid Xo‘jayev O‘zbekiston qishloq xo‘jaligigini rivojlantirishning 2020—2030-yillarga mo‘ljallangan strategiya loyihasi haqida tushuntiish berdi. Uning ta’kidlashicha, shu vaqtgacha fermerlarda o‘zlariga berilgan yerlardan qancha muddat davomida foydalanishlari mumkinligiga ishonch yo‘q edi.

“Endi fermer va dehqonlarda yerga nisbatan iste’molchilik munosabati paydo bo‘ldi. Shu vaqtgacha yerdan foydalanish huquqi bilan bog‘liq aksariyat masalalar viloyat hokimligi darajasida hal etib kelingan. Strategiyada qishloq xo‘jaligi uchun mo‘ljallangan yer uchastkalarini ochiq onlayn-auksionlar orqali taqdim etishga qaratilgan shaffof mexanizm taklif etilgan. Shu bilan birga, yer ijara shartnomasini faqat sud qarori asosida bekor qilish mumkin bo‘ladi. Yer berish huquqi hokimlardan olib qo‘yiladi — ularning aralashuviga yo‘l qo‘yilmaydi”, — dedi vazir Xo‘jayev.

Strategiyada qayd etilgan “birinchi rad etish” mexanizmiga ko‘ra, olib qo‘yilayotgan yer maydonlari birinchi navbatda shu yer maydoniga yondosh (qo‘shni) va ayni vaqtda qishloq xo‘jaligini rivojlantirishdan manfaatdor, tajribali fermerlar (yer egalari)ga beriladi. Faqatgina ular rad etgan taqdirda yer maydonlari boshqa salohiyatli xaridorlarga onlayn-auksionlar orqali taqdim etilishi mumkin.

Yerdan foydalanish va ijaraga berish huquqini sub-lizing asosida berish mexanizmini joriy etish ham rejalashtirilgan. Bu haqda vazir shunday dedi: “2021-yilga kelib qishloq xo‘jaligiga mo‘ljallangan yerlarning kadastr qiymatini aniqlash, soliq tizimlarini qayta ko‘rib chiqish va ikkilamchi bozorni rivojlantirish, uzoq muddatli ijara huquqlaridan garov sifatida foydalanishni yo‘lga qo‘yish ko‘zda tutilgan”.