Reuters: Tyumenda Telegram’ni bloklash bo‘yicha tajriba amaliyoti o‘tkaziladi

Rossiya operatorlari “Roskomnadzor”dan Telegram’ni tajriba tariqasida to‘liq blokirovka qilish uchun qurilmalarni qabul qilib oldi. Sinov sentabr oyida Tyumen shahrida o‘tkaziladi, deb xabar berdi Meduza.

Reuters agentligining telekommunikatsiya kompaniyalaridagi manbalarining so‘zlariga ko‘ra, hozirda qurilmalar mintaqaga o‘rnatilmoqda. “Sinov Tyumenda haqiqiy foydalanuvchilarga nisbatan o‘tkaziladi. Uning natijalariga ko‘ra, qurilmaning ishlashi va yuzaga keladigan nosozliklar haqida ma’lumot olamiz”, — deyiladi xabarda.

Manbaning ta’kidlashicha, trafikni filtrlash uchun “RDP.ru” tomonidan DPI texnologiyasi (mavjud trafikni tahlil qilishga asoslangan) asosida ishlab chiqarilgan kompleksdan foydalaniladi.

Telegram messenjeri Rossiya hududida 2018-yilning bahoridan boshlab rasman bloklangan. Messenjer bloklanishni aylanib o‘tuvchi texnologiyani ishlab chiqqani sabab foydalanuvchilar hozirda ham hech qanday to‘siqsiz undan foydalanib kelmoqda.