12-sentabr, payshanba kuni soat 19:49 da yong‘in-qutqaruv qismiga Namangan viloyati Uchqo‘rg‘on tumani “Turkiston” MFY Pardatursin ko‘chasida joylashgan ko‘p qavatli 3-uyning 3-qavatidagi 22-xonadonda yong‘in bo‘layotganligi haqida xabar kelib tushgan, deb xabar beradi FVV YoXBB OAV bilan hamkorlik qilish bo‘linmasi.
Yong‘inga 2 ta yong‘in o‘chirish bo‘linmasi jalb etilgan. Voqea joyiga soat 19:51 da yetib borgan yong‘in o‘chiruvchilarning tezkor harakatlari natijasida yong‘in tezda bartaraf etilgan. Yong‘in oqibatida yashash uyi balkon qismining 10 kv.metr maydonda ichki jihozlari yonib zararlangan. Yong‘indan uyning 50 kvadrat metr maydoni saqlab qolingan.
Ko‘rsatilgan manzilda gaz va havo aralashmasining portlashi natijasida yuzaga kelgan yong‘inni o‘chirishga uringan uy egasi 1978-yilda tug‘ilgan fuqaro B.N. kuyish tan jarohati olib, yong‘in o‘chirish avtoekipajlari yetib borgunga qadar shifoxonaga olib ketilganligi ma’lum bo‘lgan. Hozirda uning ahvoli qoniqarli.
“Yong‘inning taxminiy sababi gaz plitasidan sizib chiqqan tabiiy gaz to‘planib qolgan xonadagi elektr chirog‘ining yoqilishi natijasida yuzaga kelgan portlashdan. Moddiy zarar miqdori aniqlanmoqda”, — deyiladi xabarda.
Izoh (0)