O‘zbekiston musulmonlari idorasi rahbari, muftiy Usmonxon Alimov va Prezident maslahatchisi Rustam Qosimov Chechenistondagi payg‘ambar Muhammad sallollohu alayhi vasallam nomidagi masjidning ochilish marosimida ishtirok etdi. Bu haqda Uznews xabar qiladi.
24-avgust kuni Checheniston respublikasi rahbari Ramzan Qodirov Grozniyda Prezident maslahatchisi Rustam Qosimov boshchiligidagi O‘zbekiston delegatsiyasini qabul qildi. Ramzan Qodirovga davlat rahbari tomonidan yuborilgan qimmatbaho sovg‘a topshirildi.
O‘zbekiston delegatsiyasi Chechenistondagi Shali shahriga payg‘ambar Muhammad (s.a.v.) nomidagi “Musulmonlar iftixori” masjidi ochilishi marosimida ishtirok etish uchun keldi.
“Bizning xalqlarimiz mustahkam do‘stona aloqalarga ega va biz munosabatlarimizni yanada rivojlantirish va kengaytirishdan manfaatdormiz. Biz O‘zbekistonga chuqur hurmat bilan yondashamiz”, — deb yozdi Ramzan Qodirov o‘zining VKontakte sahifasida.
Shuningdek, u O‘zbekistonda Chechenistonning birinchi prezidenti Ahmat Hoji Qodirov Islom ilmlarini o‘rganganligini esladi.
https://youtu.be/j-GQcyi7VNc
“Rustam Qosimov O‘zbekiston Respublikasi Prezidenti Shavkat Mirziyoyevning tabriklarini yetkazdi. U Chechenistonda ro‘y bergan ijobiy o‘zgarishlardan hayratda ekanligini bildirdi. Uchrashuv davomida Rustam Qosimov menga juda qimmatbaho sovg‘ani - Toshkentdagi Mo‘yi Muborak madrasasida saqlanadigan eng qadimiy Qur’on qo‘lyozma nusxasini taqdim etdi. Aziz mehmonimizga minnatdorchilik bildirdim. Qardosh O‘zbekiston Respublikasiga kelgusida muvaffaqiyatlar, ravnaq va farovonlik tilayman!”, — deya so‘zlarini yakunladi Checheniston rahbari.
Izoh (0)