Davlat soliq xizmati organlari xodimlari Toshkent viloyati Bo‘stonliq tumanida dala hovlilarning ijara haqini o‘rganganda, ularning narxi sharoitiga qarab 1,8 million so‘mdan 9 million so‘mgacha ekani aniqlandi. Bu haqda O‘zA xabar bermoqda.
Misol uchun, F.Kavilova Yusufxona qishlog‘idagi dala hovlisini ijaraga berib, o‘tgan ikki oyda 120 million so‘m daromad olgan. Shu bois soliqchilar undan 10 million so‘m miqdorida deklaratsiya undirdi. Xo‘jakent qishlog‘ida yashovchi J. Zokirjon hujjatlar rasmiylashtirmasdan o‘ziga tegishli bo‘lgan dala hovlini 2 kunga 750 ming so‘mga, Yusufxona qishlog‘ida yashovchi N.Rustamova kuniga 1 million so‘m ijaraga berganligi holatlari aniqlanib, dalolatnomalar rasmiylashtirildi.
Yozgi dam olish oromgohlari va xizmat ko‘rsatish shoxobchalarida belgilangan qonunchilik talablariga rioya etilishi ustidan monitoring olib borilganda fuqarolar mazkur hududda savdo va pullik xizmatlar ko‘rsatib, soliqlarni to‘lashdan yashirinish holatlari aniqlandi.
Masalan, “ARBAT-PRESTIJ” umumiy ovqatlanish shoxobchasida o‘tkazilgan xronometrajda kunlik tushum 61 million so‘m bo‘lib, bir kun avvalgiga nisbatan 50 million so‘mga yoki 5,5 baravarga o‘sdi. “Xo‘jakent savdo sanoat servis”ga qarashli “Staraya bochka” nomli umumiy ovqatlanish va chakana savdo shoxobchalarida o‘tkazilgan xronometraj kuni tushum 13 million so‘mni tashkil etdi. Bu ular odatda ko‘rsatib kelgan kunlik o‘rtacha tushumga (1,5 million so‘m) nisbatan 6,7 barobar ko‘p demakdir. Yoki “Lazzat nur grupp”ga qarashli “Dilnur” nomli umumiy ovqatlanish shoxobchasida o‘tkazilgan xronometraj kuni tushum 6,1 million so‘mni tashkil etib, kunlik o‘rtacha tushum (2,7 million so‘m)ga nisbatan 2,2 barobarga ko‘pligi aniqlandi.
— Bo‘stonliq tumanida o‘tkazilgan ko‘zdan kechirish tadbirlarida mulkini ijaraga bergan 1384 nafar fuqaroga 1,8 milliard so‘m miqdorida qo‘shimcha soliq hisoblandi, — deydi Davlat soliq qo‘mitasi Jamoatchilik bilan aloqalar va huquqiy axborot boshqarmasi davlat soliq katta inspektori Akmal Nazarov. — Ular xonadonini, dala hovlisini, so‘rini ijaraga berib daromad olayotgan fuqarolardir. Ularga tegishli ko‘chmas mulk obyektlarini to‘liq ro‘yxatga olish va qayta baholash bo‘yicha o‘rganishlarda kadastr hujjati mavjud bo‘lmagan yoki kadastr qiymati yo‘q va past baholangan obyektlar ham aniqlandi. 1258 obyekt yangi ro‘yxatga olinishi va qayta baholanishi natijasida 400,4 million so‘m mol-mulk va yer solig‘i hisoblandi.
Izoh (0)