Perm o‘lkasi gubernatori YTHga uchragan avtobusdan odamlarni olib chiqqan o‘zbekistonlikni mukofotladi

Perm o‘lkasi gubernatori Maksim Reshetnikov O‘zbekiston fuqarosi Danil Yo‘ldoshevga YTHga uchragan avtobusdan odamlarni qutqarishdagi ishtiroki uchun minnatdorlik bildirdi.

Reshetnikov 7 yildan beri boks bilan shug‘ullanib kelayotgan yosh sportchiga minnatdorlik xati va boks qo‘lqopi topshirdi.

O‘lka hukumati Yo‘ldoshevga Rossiya fuqaroligini olishda yordam ko‘rsatishi ham xabar qilingan. Ma’lum bo‘lishicha, 20 yashar Danil Toshkentda tug‘ilgan, biroq 7 yildan beri buvisi bilan Permda yashaydi. U yil oxirigacha Rossiya fuqarosiga aylanishi mumkin.

17-avgust kuni Perm shahrida avtobus bino devoriga urilishi oqibatida bir kishi halok bo‘lgan, 34 kishi jarohatlangan edi. YTH oqibatida avtobus eshiklari ochilmay qolgan. Voqea guvohi bo‘lgan Danil orqa eshikni sindirib, avtobus ichiga kirgan va odamlarni olib chiqib, yaralanganlarga yordam bergan.