Sirdaryo viloyatida qishloq xo‘jaligi va suv xo‘jaligi vazirligining quyi tizimidagi mansabdorlari tomonidan byudjetga yetkazilgan 3 milliard so‘mdan ortiq mablag‘ undirildi. Bu haqda viloyat prokuraturasi jamoatchilik bilan aloqalar va huquqiy axborot guruhi “Daryo”ga ma’lum qildi.
Xabarda aytilishicha, sodir etilgan jinoyatlar bo‘yicha qo‘zg‘atilgan jinoyat ishlari yuzasidan joriy yilning 7 oyi davomida jami 71 ta iqtisodiyot sohasidagi jinoyat ishlari ish yurituvga qabul qilingan. Natijada 11 milliard so‘m zarar aniqlanib, tergov davomida undirilgan.
Jumladan, qishloq xo‘jaligi, suv xo‘jaligi vazirliklarining quyi tizimlaridagi mansabdorlari tomonidan byudjetga yetkazilgan 3 milliard 294 million so‘m undirilgan. Xalq ta’limi vazirligining quyi tizimlari mansabdor shaxslari tomonidan byudjetga yetkazilgan 756 million so‘m, tijorat banklari mansabdori 349 million so‘m va davlat ulushi bo‘lgan xo‘jalik yurituvchi subyekt rahbarlari tomonidan byudjetga yetkazilgan 676 million so‘m zarar undirilgan.
Shuningdek, davlat ulushi bo‘lmagan xo‘jalik yurituvchi subyektlar va fuqarolarga yetkazilgan 265 million so‘m zararlar qaytarilgan.
Izoh (0)