O‘zbekiston Qurolli Kuchlari akademiyasida 9-avgust kuni O‘zbekiston Prezidentining “Harbiy xizmatchilarining ma’naviy-ma’rifiy saviyasini oshirish tizimini tubdan takomillashtirish to‘g‘risida”gi qarori yuzasidan bir yil davomida amalga oshirilgan ishlarga bag‘ishlangan yig‘ilish bo‘lib o‘tdi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.
Yig‘ilish ushbu konsepsiyani amalga oshirish bo‘yicha respublika idoralararo komissiyasining bir yillik hisoboti tahliliga bag‘ishlandi.
Oliy Majlis Qonunchilik palatasi deputatlari, Jismoniy tarbiya va sport vazirligi, Respublika ma’naviyat va ma’rifat markazi, O‘zbekiston Milliy axborot agentligi, O‘zbekiston xotin-qizlar qo‘mitasi, Vazirlar Mahkamasi huzuridagi “Oila” ilmiy-amaliy tadqiqot markazi, “Mahalla”, “Nuroniy” jamg‘armalari, O‘zbekiston Yozuvchilar uyushmasi, Yoshlar ittifoqi Markaziy kengashi vakillari, viloyat hokimlarining o‘rinbosarlari ishtirok etgan tadbirda idoralararo komissiya faoliyatining yutuq va kamchiliklari sarhisob qilindi.
Mudofaa vazirining o‘rinbosari general-mayor Azizbek Ikramov yig‘ilish davomida so‘zga chiqib, o‘tgan bir yil davomida mahalliy davlat hokimiyati organlarining tegishli qarorlari ishlab chiqildi, hududiy idoralararo komissiyasining ta’sis yig‘ilishi o‘tkazilganini ta’kidlab o‘tdi.
Yig‘ilishda Qurolli Kuchlar harbiy xizmatchilarining ma’naviy-ma’rifiy saviyasini oshirish ishlarida eskicha qolip va andozalardan voz kechish, faoliyatida to‘siq bo‘layotgan omillarni hamjihatlikda bartaraf etish bo‘yicha vazifalar belgilab olindi.
Yig‘ilish yakunida respublika idoralararo komissiyasi a’zolariga Mudofaa vazirligining “Yosh avlodni harbiy-vatanparvarlik ruhida tarbiyalashdagi ishtiroki uchun” ko‘krak nishoni topshirildi.
Izoh (0)