Wealth-X 2019 Billionaire Census hisobotiga ko‘ra, bugungi kunda sayyoramizdagi eng boy odamlarning to‘rtdan uch qismi dunyoning 15 mamlakatida yashaydi. Ularning jami boyligi 6,8 trillion dollarni tashkil etadi. Bu ko‘rsatkich dunyodagi jami milliaderlar umumiy boyligining 79 foizini tashkil qiladi.
Quyida dunyoning eng ko‘p milliarderlari yashaydigan mamlakatlar reytingini keltiramiz.
11. BAA
Milliarderlar soni: 55
Umumiy mablag‘i: 165 milliard AQSh dollari
BAA — Yaqin Sharqdagi eng ko‘p milliarderlar yashaydigan mamlakat. U eng ko‘p milliarderlar yashaydigan mamlakatlar reytingida 11-o‘rinni Fransiya bilan bo‘lishadi.
BAA milliarderlari asosan neft savdosi tufayli boyigan.
BAA milliarderlarining asosiy qismi mamlakatning eng yirik shahri bo‘lmish Dubayda istiqomat qiladi.
10. Fransiya
Milliarderlar soni: 55
Umumiy boyligi: 195 milliard dollar
Fransiya milliarderlarining asosiy qismini bu mamlakat dong taratgan moda industriyasi va parfyumeriya sanoatidan yetishib chiqqan milliarderlarlar tashkil etadi.
Shuningdek, oxirgi yillarda milliy korporatsiyalar ham katta iqtisodiy o‘sishga erishdi, ulardan ham anchagina milliarderlar yetishib chiqdi.
Fransiya milliarderlarining asosiy qismi poytaxt Parijda yashaydi.
9. Saudiya Arabistoni
Milliarderlar soni: 57
Umumiy boyligi: 147 milliard dollar
Saudiya Arabistonidan yetishib chiqqan milliarderlarning qariyb barchasi mamlakatning neft qazib chiqarishi, uni eksport qilishi va neft mahsulotlari ishlab chiqarishi ortidan paydo bo‘lgan.
Bu mamlakatda dunyodagi eng yirik neftni qazib olish, sotish va qayta ishlash kompaniyalari joylashgan.
8. Hindiston
Milliarderlar soni: 82
Umumiy boyligi: 284 milliard dollar
Hindiston milliarderlari turli sohalardan yetishib chiqqan.
Mamlakat milliarderlarining asosiy qismi Mumbayda yashaydi.
Oxirgi 20 yilda Hindistonda “po‘lat qiroli” Mittalga o‘xshab ma’lum bir soha bo‘yicha dunyoda nom qozongan va o‘sha sohada dunyoning ko‘plab mamlakatlarida faoliyat yuritadigan kompaniya shakllantirgan insonlar ko‘paydi.
Mamlakatda daromad taqsimoti boshqa mamlakatlardan keskin farq qiladi. Hindistondagi yarim milliard odam kuniga 1–2 dollar daromad qilgani holda, boylar tez boyib boryapti. 2017-yil holatiga ko‘ra, Hindistonda 1 foiz aholi mamlakat boyligining 73 foiziga egalik qiladi.
7. Gonkong
Milliarderlar soni: 87
Umumiy boyligi: 259 milliard dollar
Gonkongda oxirgi yillarda milliarderlar soni ancha kamaydi. Ba’zilarining mablag‘i kamaygan bo‘lsa, ba’zilari boshqa davlatlarga ko‘chib o‘tgan.
Gonkongdagi milliarderlar asosan ko‘chmas mulk qurish, uning oldi-sotdisi kabi sohalardan chiqib kelgan. Gonkong dunyodagi ko‘chmas mulk eng qimmat hududlardan biri hisoblanadi. Bu yerda bir uyning o‘rtacha narxi 1,28 million dollarga teng.
6. Shveysariya
Milliarderlar soni: 91
Umumiy boyligi: 240 milliard dollar
Shveysariya milliarderlari asosan oltin, brilliant, olmos savdosidan chiqib kelgan. Shuningdek, mamlakatda asrlar davomida dunyoga taniqli brendlar shakllangan soatsozlik, qandolatchilik sohalaridan ham anchagina milliarderlar yetishib chiqqan.
Mamlakatda soliq yukining kamligi ham yangidan yangi milliarderlar yetishib chiqishiga sabab bo‘lyapti.
5. Buyuk Britaniya
Milliarderlar soni: 97
Umumiy boyligi: 209 milliard dollar
Buyuk Britaniya milliarderlari ham turli sohalarda yetishib chiqqan. Ularning katta qismi nafaqat Buyuk Britaniya, balki tom ma’noda Yevropaning moliya markazi hisoblanadigan Londonda yashaydi.
4. Rossiya
Milliarderlar soni: 102
Umumiy boyligi: 335 milliard dollar
Rossiya milliarderlarining asosiy qismi neft, gaz va metall qazib olish, sotishdan kelib chiqqan. Ularning asosiy qismi poytaxt Moskvada yashaydi.
3. Germaniya
Milliarderlar soni: 146
Umumiy boyligi: 442 milliard dollar
Germaniya Yevropaning eng yirik iqtisodiyoti sanaladi. Shuning uchun ham Germaniyani Yevropa iqtisodiyotini oldinga boshlaydigan lokomotiv deb atashadi.
Bu mamlakatdan chiqqan milliarderlar turli sohalarda ishlaydi.
2. Xitoy
Milliarderlar soni: 285
Umumiy boyligi: 996 milliard
Xitoyda bir paytlar boy bo‘lish mumkin emas edi. Mamlakatdagi sotsialistik tuzum bunga yo‘l qo‘ymasdi. Ammo o‘tgan asrning 80-yillaridan, Mao Szedun vafotidan keyin mamlakat mulk egaligi va boylik to‘plash masalasini isloh qildi. O‘shandan keyin imkoniyatini topgan odam ortiqcha xavotirsiz boylik to‘play boshladi.
Xitoy milliarderlari ham turli sohalardan chiqqan, ammo ko‘proq qismi AT texnologiyalari, mahsulotlari va elektron savdo sohalarida, shuningdek, qurilishdan chiqqan.
Xitoy milliarderlari asosan ikkita shaharda — Xanjou va Shenchjenda istiqomat qiladi.
1. AQSh
Milliarderlar soni: 705
Umumiy boyligi: 3,013 trillion dollar
AQSh dunyoda milliarderlar soni va ularning umumiy boyligi masalasida mutlaq birinchi o‘rinda turadi. AQShning ilk milliarderlari XIX asr oxiri — XX asr boshida neft savdosi tufayli paydo bo‘lgan. O‘shandan buyon bu mamlakatda milliarderlar soni va ularning umumiy mablag‘i faqat va faqat o‘sib kelyapti.
AQSh milliarderlari turli sohalardan yetishib chiqqan. Bu mamlakat kompaniya va korporatsiyalari Ikkinchi jahon urushidan keyin faoliyatini butun dunyo bo‘ylab yoydi. Avtomobilsozlik, oziq-ovqat, samolyotsozlik, qurol-yarog‘ savdosi, shuningdek, o‘tgan asrning 80-yillaridan boshlab AT sohasi, elektron savdo va boshqa ko‘pgina sohalarda qit’alararo xizmat ko‘rsatadigan va savdo ishlarini olib boradigan ko‘plab kompaniyalar shakllandi, shunga yarasha milliarderlar yetishib chiqdi.
AQSh milliarderlari dunyo milliarderlarining 27 foizini, ularning mablag‘i esa dunyo milliaderlari qo‘lida to‘plangan mablag‘ning 35 foizini tashkil etadi.
AQSh milliarderlari asosan Nyu-York, San-Fransisko va Los-Anjeles shaharlarida istiqomat qiladi.
Izoh (0)