O‘zbekistonlik ziyoratchilarning oxirgi guruhlari ham haj amalini bajarish uchun Saudiya Arabistoniga sog‘-salomat yetib keldi. Bu haqda “Xalq so‘zi” xabar bermoqda.
Ishchi guruhi tomonidan 7200 nafar o‘zbekistonlikka muqaddas ikki shaharda ibodatlarni risoladigidek bajarib, hoji maqomiga ega bo‘lishi uchun barcha shart-sharoit yaratib berilgan. Xususan, ularga sifatli va tezkor tibiiy xizmat ko‘rsatish maqsadida Makka shahrida tibbiyot markazi tashkil etildi.
“Haj — 2019” mavsumida har bir ziyoratchiga o‘z vaqtida tegishli tibbiy maslahat hamda zarur muolajalarni amalga oshirish bo‘yicha Sog‘liqni saqlash vazirligi bilan o‘zaro kelishuvga erishilgan. Unga ko‘ra, muborak safar oldidan hamma chuqurlashtirilgan tibbiy ko‘rikdan o‘tkazilgan edi. Safar davomida esa 35 nafar malakali shifokor hojilarga tunu kun xizmat ko‘rsatish uchun jalb etildi.
Shifokarlar guruhi rahbari Alisher Soatovning aytishicha, 40 o‘ringa mo‘ljallangan mazkur markazga 140 million so‘mlik dori-darmon yetkazib berilib, zarur tibbiy vositalar bilan jiholandi.
— Bizning hojilar uchun yaratilgan shart-sharoitlarga ko‘pchilik havas bilan qaramoqda, — deydi Alisher Soatov. — Masalan, Saudiya Arabistoni Haj vazirligi tomonidan ziyoratchilarga xizmat ko‘rsatish borasida eng yuqori o‘rinlarda deya e’tirof etilayotgan Turkiya davlati ham Makka shahridagi biror shifoxonani ijraga oladi. Bizda esa bevosita mehmonxonaning o‘zida bu xizmat tashkil etilgan.
Tibbiyot markazining 20 o‘rni ayollar uchun mo‘ljallangan bo‘lib, ularga 10 nafar ayol shifokor tomonidan xizmat ko‘rsatilmoqda.
Izoh (0)