“Daryo” surishtiruvidan so‘ng: urgutlik egizaklarga kir mashinasi sovg‘a qilindi, bolalar tibbiy ko‘rikdan o‘tkazildi

Bir muddat ilgari “Daryo”da Samarqand viloyati Urgut tumanidagi To‘rtko‘l mahallasida dunyoga kelgan uch egizak – Shavkatbek, Ziroatxon va Saidaxon haqida maqola chop etilgan edi. Materialda taxminan uch oy muqaddam tug‘ilgan bolalarga mas’ul tashkilotlar tarafidan e’tibor qaratilmagani, ayni paytda oila moddiy qiyinchiliklarga duch kelayotgani aytilgan edi.

“Urgut sadosi” gazetasining ma’lum qilishicha, tuman hokimi o‘rinbosari, Xotin-qizlar qo‘mitasi raisi Zamira Murtazoyeva egizaklar holidan xabar olish uchun ularning xonadonida bo‘ldi. U go‘daklarning onasiga kir yuvish mashinasi, egizaklarga esa kiyim-kechak, tagliklar va boshqa zarur buyumlardan iborat tuman hokimligi sovg‘a-salomlarini topshirdi.

Shuningdek, tuman tibbiyot birlashmasi mutaxassislari kichkintoylarni ko‘rikdan o‘tkazdi va egizaklar parvarishi uchun kerakli tavsiyalar berdi.