“Yuksalish” umumiy harakati Sirdaryo viloyati hududiy bo‘limiga bino va Cobalt mashinasi topshirildi

Guliston shahrida Nodavlat notijorat tashkilotlari uyining tantanali ochilish marosimi bo‘ldi, deb xabar bermoqda O‘zA.

Shu munosabat bilan tashkil etilgan tadbirda Sirdaryo viloyati hokimligi, adliya boshqarmasi, nodavlat notijorat tashkilotlari, mutasaddi idoralar rahbar va xodimlari ishtirok etgan.

Viloyat hokimligi tomonidan “Guliston tajriba ta’mirlash kichik sanoat boshqarish direksiyasi” davlat unitar korxonasiga qarashli bo‘lgan binoning birinchi qavatida 450 million so‘mlik ta’mirlash ishlari amalga oshirilib, to‘liq jihozlangan.

Bino hamda Cobalt xizmat mashinasi kaliti tantanali ravishda “Yuksalish” umumiy harakati — nodavlat notijorat tashkiloti viloyat hududiy bo‘limi rahbari Sarvar Sultonovga topshirilgan.

Uning ta’kidlashicha, ushbu binoda bir qator nodavlat notijorat tashkilotlari “nol” qiymatli ijara to‘lovi bilan faoliyat yuritadi. Ular qatorida O‘zbekiston Nogironlar, Ko‘zi ojizlar jamiyatlari, “Bolalar va oilalarni qo‘llab-quvvatlash assotsiatsiyasi” viloyat bo‘limlari, nogiron bolalar va ularning ota-onalari viloyat uyushmasi kabi tashkilotlar ham bor.