Farg‘onada Koreyaga ishga jo‘natishni va’da qilib, ko‘plab odamlarning pullarini firibgarlik bilan qo‘lga kiritgan shaxslarga sud tomonidan jazo tayinlandi, bu hadqa O‘zA xabar qiladi.
Ba’zi kishilar ishlarini osongina hal qilish maqsadida noqonuniy yo‘lni tanlaydi. Tanish-bilish axtarib, firibgarning tuzog‘iga ilinadi. Xususan, xorijga borib ishlashning o‘ziga yarasha tartib-qoidalari bor. Ammo Koreyada ishlamoqchi bo‘lgan ayrim fuqarolar firibgarlarga duch kelib, chuv tushdi.
Farg‘ona tumanilik D.A. va marg‘ilonlik R.A.ga firib bobida teng keladigani yo‘q. Ular odamlarni aldab, Tashqi mehnat migratsiyasi agentligida ishlashini va xususiy firmasi orqali O‘zbekiston fuqarolarini Koreya Respublikasiga ishlash uchun yuborishini aytib, juda ko‘p miqdordagi mablag‘ni qo‘lga kiritgan. Odamlar ham soddalarcha, ular aytgan pullarini o‘z qo‘llari bilan mana shu “uddaburon” firibgarlarga tutqazgan.
Aniqlanishicha, R.A. bitta epizodda I.A. bilan oldindan til biriktirib, Yo.E.ning o‘g‘li M.M., jiyanlari S.E., O.O., qo‘shnilari Sh.B., U.G‘., O.M., S.X.ni tijorat yo‘nalishi orqali Janubiy Koreyada yollanma ishchi sifatida ishga yuborishga va’da beradi. Buning uchun sarf-xarajatlariga pul zarur bo‘lishini aytib, aldab, 2016-yil may oyidan 2016-yil noyabr oyiga qadar Yo.E.ning juda ko‘p miqdordagi 37 ming 900 AQSh dollarini firibgarlik yo‘li bilan qo‘lga kiritgan. Birgina R.A.ning o‘zi sheriklari bilan 20 ta holatda 140 ming dollardan ortiq pullarni firibgarlik yo‘li bilan olgan.
D.A. koreys tilini juda ham yaxshi bilardi. Afsuski, bu yosh yigit nafs yo‘liga kirib, umidlarini puchga chiqardi. Firibgarlikni odat qilgan Davlatyor Koreyaga ishga borish uchun ajratilgan barcha kvotani sotib olganligini aytib, ko‘plab fuqarolarni aldab kelgan. 2016-yil iyun oyida Jizzax viloyatida bo‘lgan 18 nafar fuqarolarni hujjatlari va 25 ming dollarini olib, ularga tez kunlarda shartnoma kelishini aytib, Koreyaga ishga jo‘natishni va’da qiladi. Shuningdek, u bu ishlarni davom ettirib, ko‘plab odamlarni ham mablag‘larini firibgarlik bilan qo‘lga kiritgan. Ammo vaqt o‘tsa hamki, ishdan darak bo‘lmadi. Jabrlanuvchilar firibgarlarning qilmishi yuzasidan huquqni muhofaza qiluvchi idoralarga ariza bilan murojaat qildi.
Jinoyat ishlari bo‘yicha Marg‘ilon shahar sudi tomonidan mazkur jinoyat ishi ko‘rib chiqilib, D.A. va A.R.ga 6 yil ozodlikdan mahrum qilish jazosi tayinlandi. Jabrlanuvchilarga yetkazilgan zarar hukm e’lon qilingan kunda AQSh dollarining so‘mga nisbatan qiymatidan kelib chiqib undirilishi belgilandi.
Izoh (0)