Kanadaning Albert provinsiyasidagi Vermilion muzeyi sayyohlar orasida juda ham mashhur emas. O‘z nomini u Kanadaning xuddi shunday nomga ega bir guruh orollaridan olgan. Tabiatning ushbu ajoyib burchagi Banf milliy parkining bir qismi hisoblanadi. Arxeologlarning aniqlashicha, bu yerda 10 ming yil avval odamlar yashagan, deya yozadi Travel Ask.
Muassasaning o‘zi haqida gapiradigan bo‘lsak, u tashrif buyuruvchilarga bu yerda yashagan qadimgi odamlarning turmush tarzi haqida hikoya qiladi. Bino esa ularning uyini aks ettiradi. Muzeyda nafaqat mahalliy aholi tasvirlangan, balki o‘sha davrda qishloq xo‘jaligi, do‘konlar va savdoning ko‘rinishi qanday bo‘lgani ham yoritilgan. Shuni ta’kidlash kerakki, muzeyda ko‘plab kolleksiyalar mavjud. Biroq 70-yillardagi mahalliy mehmonxonalardan birining yopilishi natijasida muzey tomonidan meros qilingan eski seyf alohida ahamiyatga ega.
Aslida, og‘ir metall saqlash jihozi qulflangan va hech kim uning ichida nima borligini va qanday ochishni bilmas edi. O‘nlab yillar davomida muzey xodimlari ishlab chiqaruvchilar, mutaxassislar, temirchilarni taklif qilib, uni ochishga urindi. Muzey vakillari hatto sayohatchilar uchun xavfsiz turdagi ko‘ngilochar tadbirlarni uyushtirib, uni ochib ko‘rish haqida tanlov e’lon qildi. Biroq, bularning hammasi foydasiz edi, katta seyf o‘z sirlarini saqlab qoldi.
Iyun oyida esa muzeyga 36 yoshli Stiven Mills ismli sayyoh tashrif buyurdi. U shaharga bolalari va rafiqasi bilan kelgan edi, lekin u kelgan kun muzey ishlamadi. Shunda tabdbirkor oila boshlig‘i shu yerlik ko‘ngillilardan biri bilan kelishdi va ichkariga kichik ekskursiya uyushtirdi. Ekskursiya davomida seyf haqida gap ketdi. Sayyoh esa kutilmaganda uni ochishga muvaffaq bo‘ldi.
Hamma hayratga tushdi deyishning o‘zi kamlik qiladi. Stivenning o‘zi 60 gacha bo‘lgan raqamlarga qaragan, keyin esa mexanizmga quloq solgan hamda oddiy raqamlar kombinatsiyasi, ya’ni 20-40-60 ni tergan. 3 marta o‘ngga, 2 marta chapga va yana 1 marta o‘ngga buragan. Seyfning eshigi ochilganida o‘zi ham hayron bo‘lganidan ortga tisarildi.
Seyfning ichida bir ofitsiantga tegishli bo‘lgan qaydlar qog‘ozi, 77—78-yillardagi gazetalar, shuningdek, mehmonxona kvitansiyasi bor ekan.
Izoh (0)