Xalq deputatlari Toshkent shahar Uchtepa tuman Kengashi deputati, O‘zLiDeP deputatlik guruhi rahbari o‘rinbosari Nuriddin Zaynitdinov bloger Nozim Safarovga nisbatan o‘tkazilayotgan bosim yuzasidan o‘z munosabatini bildirdi. Matn quyida to‘lig‘icha keltirilgan.
“Buyurtma” orqali Toshkent shahar Yunusobod tumani (IIO FMB) Ichki ishlar organlari xodimlari tomonidan “Safari” Telegram kanali asoschisi, jurnalist, bloger Nozim Safarovni siquvga olishga urinish, qo‘rqitish, haqoratlash, qamash bilan tahdid qilib, bosim o‘tkazilganini o‘ta sharmandali holat va O‘zbekistonda so‘z erkinligini ta’minlanishi borasida shuncha olib borilayotgan ishlarni qaysidir ma’noda yo‘qqa chiqarishga urinish deb qabul qilaman.
Blogerlar va Telegram kanallar adminlarini qo‘rqitish va ularga bosim o‘tkazishga urinishlarni keskin qoralayman va bunday holatlarga yo‘l qo‘yib bo‘lmaydi.
Shu 1 hafta ichida Yunusobod tumani Ichki ishlar organlari xodimlari tomonidan ikkinchi bloger shunday holatga tushirilishi xavotirli signaldir.
Kimlar va nima maqsadda blogerlar va Telegram kanallar adminlarini qo‘rqitish va ularni jazolashga urinib, bosim o‘tkazayotgani tegishli Agentlikning nazoratiga olinsa, vaziyatga oydinlik kiritiladi degan umiddaman.
Biroq bu holatlarga jiddiy qarash lozim va blogerlarni, shuningdek, Telegram kanallar adminlarini himoya qilishimiz shart.
Aks holda bizning jamiyatda o‘z o‘rni va ovozi orqali O‘zbekiston rivojiga, aholi va jamiyat muammolarini yoritishga jiddiy kirishgan siyosiy va ijtimoiy sohalarda yozadigan blogerlar va Telegram kanallar adminlari qatlamini yo‘q qilishga, ovozini o‘chirib qo‘yishga urinuvchilar borligi sezilib qoldi.
Nozim Safarovga va boshqa blogerlar, Telegram kanallar adminlariga nisbatan Ichki ishlar xodimlari tomonidan qilingan noqonuniy xatti-harakatlar va “buyurtma”larni tegishli Agentlik, prokuratura va Ichki ishlar organlari tomonidan alohida nazoratga olinishi va qonuniyligini tekshirilishini so‘rayman.
Ularga nisbatan qo‘pol muomalada bo‘lgan, haqorat qilib, qo‘rqitib, bosim o‘tkazgan xodimlar o‘z ishiga loyiqmi? Shu masalani jiddiy ko‘rib chiqilishi kerak.
Bunday Ichki ishlar organlari xodimi nomiga dog‘ tushirib, olib borilayotgan siyosatni anglab yetmaydigan, eskicha ishlash usulibidan qutila olmagan xodimlar borligi IIV tizimi imiji va nomiga putr yetkazadi deb hisoblayman.
Eslatib o‘tamiz, 30-iyun kuni bloger Nozim Safarov o‘zining Telegram kanalida Ichki ishlar xodimlari tomonidan unga nisbatan nohaq bosim o‘tkazilayotganini xabar qildi.
Biroz oldin esa Nozim Safarov o‘zining Facebook’dagi sahifasida Sardor komilov bilan kelishib olganini hamda IIBB xodimlaridan hech qanday da’vosi yo‘qligini ma’lum qildi.
Izoh (0)