XX asrning ikkinchi yarmi tom ma’noda iqtisodiy inqiloblar asri bo‘ldi. Kechagina o‘z kapitalini million dollarga zo‘rg‘a chiqargan kompaniyalar asr oxiriga va XXI asr boshiga kelib o‘z mablag‘ini milliardlik raqamlarda hisoblaydigan katta korporatsiyalarga aylandi. Ayniqsa XX asr oxiri – XXI asr boshida ochilgan axborot texnologiyalari va internet sohasida turli maqsadlarda ochilgan kompaniyalar bugun o‘z aylanma mablag‘ini nafaqat milliard, balki trillionlik marraga yaqinlashtiryapti. Mutaxassislarning tahlillariga ko‘ra, yaqin 1–2 yilda dunyoning bir nechta korporatsiyasi aylanma mablag‘ini trillionlik marradan o‘tkazadi.
Quyida 2019-yil yanvar oyi holatiga ko‘ra dunyoning mablag‘i eng katta bo‘lgan korporatsiya va kompaniyalari o‘ntaligi keltiriladi.
10. JP Morgan Chase
Bugungi kunda qiymati: 332,24 milliard dollar
Sohasi: Bank ishi
Ushbu bank aylanma mablag‘ miqdori bo‘yicha AQShda 1-o‘rinda, dunyoda esa 6-o‘rinda turadi. Bosh ofisi Nyu-York shahri, Manxetten tumanida, 270 Park Avenue’da joylashgan.
9. Johnson & Johnson
Bugungi kunda qiymati: 347,99 milliard dollar
Sohasi: farmatsevtika
Ushbu kompaniyani 1886-yilda aka-uka Jonsonlar tuzgan. Bugungi kunda ushbu kompaniya mahsulotlari 60 davlatda ishlab chiqariladi, 175 davlatda sotiladi.
Bosh ofisi Nyu-Jersi shtati, Nyu-Bransuik shahrida joylashgan.
8. Alibaba Group
Bugungi kunda qiymati: 392,25 milliard dollar
Sohasi: internet, elektron savdo
Mahsulotlari: elektron savdo, onlayn auksion, onlayn tarjimalar, onlayn pul o‘tkazmalari, tezkor savdo
Alibaba kompaniyasi Xitoyda birinchi o‘rinda, dunyoda esa yuqori o‘rinlardan birida turuvchi elektron savdo platformalaridan biri hisoblanadi. U 1999-yil 4 aprelda tuzilgan. Bosh ofisi Xitoyning Xanjou shahrida.
7. Tencent
Bugungi kunda qiymati: 400,90 milliard dollar
Sohasi: ijtimoiy tarmoqlar, OAV, veb-portallar
Kompaniya bugun quyidagi yo‘nalishlarda xizmat ko‘rsatib bormoqda: ijtimoiy tarmoqlar, mobil o‘yinlar, to‘lov xizmatlari, internet-servis, smartfonlar ishlab chiqarish.
Kompaniya Xitoyda 1998-yilda ochilgan. Bosh ofisi Nanshan shahrida.
6. Facebook
Hozirgi kunda qiymati: 413,25 milliard dollar
Sohasi: ijtimoiy tarmoq
Ijtimoiy tarmoqni 2004-yilda Mark Sukerberg ochgan. Bugungi kunda ijtimoiy tarmoqqa bir kunda 1,86 milliard odam kiradi.
Facebook birgina reklamaning o‘zidan yiliga 8 milliard dollar sof foyda oladi.
Bosh ofisi Kaliforniya shtati, Menlo-Park shahrida.
5. Berkshire Hathaway Inc.
Hozirgi kunda qiymati: 482,36 milliard dollar.
Kompaniya ko‘p tarmoqli hisoblanadi: sug‘urta, moliya, temir yo‘l, kommunal xizmatlar va boshqa ko‘plab sohalar. Kompaniya amerikalik milliader Uorren Baffetga tegishli.
Kompaniyaning sho‘ba korxonalari ro‘yxati:
GEICO (avtosug‘urta);
General Re (oldindan sug‘urta qilish);
Berkshire Hathaway Primary Group (sug‘urta);
Berkshire Hathaway Reinsurance Group (sug‘urta va oldindan sug‘urta qilish);
BNSF — (temiryo‘l transporti);
Berkshire Hathaway Energy (elektr va gaz ta’minoti);
McLane Company (ulgurji savdo).
Bosh ofisi Nebraska shtati, Omaxa shahrida.
4. Apple Inc.
Hozirgi kundagi qiymati: 720,12 milliard dollar
Sohasi: elektronika va axborot texnologiyalari, planshet, kompyuter, mobil telefonlar ishlab chiqarish.
Kompaniyani 1976-yilda Stiv Jobs, Stiv Voznyak va Ronald Ueynlar tashkil etgan. Bugungi kunda bu kompaniyada dunyo bo‘ylab 132 ming xodim ishlaydi. Bosh ofisi Kaliforniya shtati, Kupertino shahrida.
Apple uzoq vaqt dunyoning eng qimmat kompaniyasi bo‘lib keldi. Ammo oxirgi bir nechta telefon markalarining muvaffaqiyatsiz chiqishi va sarmoyadorlarning ishonchsiz munosabatlari kompaniya aksiyalarining narxini 30 foizga arzonlab ketishiga sabab bo‘ldi. Shu tariqa, u eng qimmat kompaniyalar ro‘yxatidagi 1-o‘rnini boshqalarga bo‘shatib berdi.
3. Alphabet Inc.
Hozirgi kundagi qiymati: 737,37 milliard dollar
Sohasi: internet xizmatlari
Bu nomi o‘zgargan Google kompaniyasidir. Alphabet Inc. kompaniyasi nafaqat Google’ga, balki AdWords, Android, YouTube kabi o‘ttizga yaqin taniqli brendlarga va kompaniyalarga egalik qiladi.Kompaniyaga 1998-yilda Sergey Brin va Larri Peyjlar asos solgan.
Bosh ofisi Kaliforniya shtatida joylashgan.
2. Microsoft
Hozirgi kundagi qiymati: 789,25 milliard dollar
Sohasi: turli elektron dasturlar savdosi.
Microsoft bugun bozor qiymatiga ko‘ra dunyoning ikkinchi eng qimmat kompaniyasi hisoblanadi.
Asosiy mahsulotlari Microsoft Office, Windows va Xbox bo‘lgan ushbu kompaniyaga 1975-yilda Bill Geyts asos solgan.
Bugungi kunda Microsoft dasturlar yaratish va sotish bo‘yicha dunyoning eng old kompaniyasi hisoblanadi. Uning Windows dasturi dunyodagi eng ommabop dasturdir.
Shtab-kvartirasi Vashington shtatidagi Redmond shahrida joylashgan.
1. Amazon Inc.
Hozirgi kundagi qiymati: 802,18 milliard dollar
2019-yil 7-yanvar kuni AQShning yana bir kompaniyasi — Amazon Microsoft’ni quvib o‘tib, jahonning eng qimmat kompaniyasiga aylandi.
Amazon – bu nafaqat AQSh, balki butun dunyoda turli mahsulotlarni internetda sotishga ixtisoslashgan eng yirik kompaniya.
Amazon onlayn maydonchasi yordamida internet foydalanuvchilari, shuningdek, yetkazib beruvchilar, ishlab chiqaruvchilar istalgan mahsulotni sotishi va sotib olishi mumkin.
Kompaniyaga 1994-yilda Jeff Bezos tomonidan asos solingan. Kompaniya bosh ofisi Vashington shtatining Sietl shahrida joylashgan.
Kompaniyada bugungi kunda umumiy hisobda 230 ming xodim ishlaydi.
Izoh (0)