Namanganlik eng faol jurnalist kelgusi yili 27-iyun kuni Spark avtomobili bilan taqdirlanadi va bu rag‘batlantirish kelgusida an’anaga aylanadi. Bu haqda viloyat hokimi Xayrullo Bozorov ma’lum qildi, deya xabar beradi “Daryo” muxbiri.
Viloyat ommaviy axborot vositalari xodimlari, noshirlar, matbaachilar, faxriy jurnalistlar ishtirokidagi tadbir Namangan shahridagi “Sherdor” tantanalar uyida o‘tkazildi. Unda ishtirok etgan viloyat hokimi Xayrullo Bozorov viloyat jurnalistlarining yirik anjumanlar, xususan, “Gullar bayrami” va xalqaro investforumni yoritishdagi jonbozligi, ushbu tadbirlarga ilk bor xorijdan ham ko‘plab jurnalistlar kelganini e’tirof qildi.
Viloyatda OAVning an’aviy turlari qatori internet-nashrlari va ijtimoiy tarmoqlar ham jadal rivojlanib borayotgani, ularning ayrimlari yuz minglab o‘quvchi ega ekanligini qayd etdi.
Bayramda bir guruh jurnalistlar va blogerlarga viloyat hokimining faxriy yorlig‘i hamda sovg‘alar topshirildi. Shuningdek, maxsus nominatsiyalar g‘oliblari ham taqdirlandi.
Namanganda ro‘y berayotgan yangiliklar va o‘zgarishlarni keng yoritgan, bu borada eng katta auditoriyaga erishgan jurnalistga kelgusi yildan boshlab kasb bayramida Spark avtomobili berilishi e’lon qilindi.
Tadbirda taqdirlangan jurnalistlar so‘zga chiqdi, bayram konsert dasturi namoyish qilindi.
Qayd etish joizki, Namanganda “Gullar bayrami” g‘oliblariga Spark avtomobillari topshirilishi an’anaga aylanib ulgurgan.
Izoh (0)