O‘zbekiston Qurolli kuchlari Rossiyaning ko‘p maqsadli “Tigr” zirhli avtomobillari partiyasini sotib oldi. Bu haqda “Armiya-2019” beshinchi xalqaro harbiy-texnik forumida ishtirok etayotgan O‘zbekiston rasmiy delegatsiyasi vakilining so‘zlariga asoslanib “TASS” xabar berdi.
“Avtomobillar O‘zbekiston maxsus bo‘linmalarining talabi bo‘yicha takomillashtirilgan. Xususan, zirhlangan korpusga qo‘shimcha eshiklar, hamma oynalarga himoya panjaralari qo‘yildi, tomga esa infraqizil projektor va old va orqa tuynuklarga o‘qchini himoya qiluvchi yig‘ma zirhlar o‘rnatildi”, – degan o‘zbek delegatsiyasining vakili.
Uning aytishicha, ushbu konfiguratsiyadagi “Tigr”lar 7,62 millimetr kalibrli PKM pulemyotlari bilan jihozlangan.
“Ushbu ‘Tigr’lar bizga ma’qul bo‘ldi. Mashina maxsus bo‘linmaga yuklangan barcha topshiriqlarni bajarishda qo‘l keladi, askar uchun uy vazifasini o‘tashi ham mumkin. Har qanday avtomobil ham shunday qulayliklarga ega bo‘lavermaydi”, – deb ta’kidladi manba.
“Tigr” zirhli mashinalari jangchilar va har xil yuklarni tashishga, patrullik qilishga, maxsus operatsiyalar chog‘ida bo‘linmani jangovar qo‘llashga mo‘ljallangan.
Izoh (0)