Nukus garnizonida joylashgan harbiy qismlardan birida shtat qurolidan jangovar o‘q otish rejaviy mashg‘ulotlari o‘tkazilmoqda. Poligonga qadar bo‘linmalar 40 kilometr masofaga marsh uyushtirdi, jumladan, uning yarmi piyoda bosib o‘tildi. Bu haqda O‘zbekiston Mudofaa vazirligi Shimoli-g‘arbiy harbiy okrug matbuot xizmati “Daryo”ga xabar berdi.
Poligondagi amaliy mashg‘ulotlar o‘qotar qurollardan tungi sharoitda nishonlarni yakson qilishdan boshlandi. Piyoda bosib o‘tilgan uzoq masofali marsh shaxsiy tarkibning jismoniy va ruhiy-psixologik holatida ta’sir ko‘rsatmadi. Nishonlar yuqori aniqlikda mo‘ljalga olindi.
Harbiy xizmatchilarning o‘tochar quroldan foydalanish ko‘nikmasi kunduz kuni jazirama issiq va quruq havoda ham toblandi. Butun dala o‘quv maydoni bo‘ylab o‘quv nuqtalari tashkil etilib, harbiy xizmatchilarga amaliy harakatlar orqali qurollarni shay holatga keltirish bo‘yicha tushunchalar berildi.
Shuningdek, muddatli harbiy xizmatchilar birinchi bor minomyotlardan o‘t ochish mashg‘ulotlarida qatnashdi.Poligondagi amaliy harakatlar davom etmoqda. Oldinda ZU-23-2 zenit qurilmalaridan o‘t ochish mashg‘ulotlarini o‘tkazish rejalashtirilgan.
Izoh (0)