Toshkentdagi “O‘zekspomarkaz” milliy ko‘rgazmalar majmuasida 20-iyun kuni O‘zbekiston Prezidenti sovrini uchun tadbirkorlar, fermerlar va hunarmandlar o‘rtasida “Tashabbus – 2019” ko‘rik-tanlovining mamlakat bosqichiga start berildi. Bu haqda “Daryo” muxbiri xabar bermoqda.
Ko‘rik-tanlovning hududiy bosqichlarida g‘oliblikni qo‘lga kiritgan tadbirkorlar, fermerlar va hunarmandlar, jumladan yosh tadbirkorlar ishtirok etmoqda.
Tanlovning tuman (shahar) bosqichi 22-apreldan 15-mayga qadar, Qoraqalpog‘iston Respublikasi, viloyatlar va Toshkent shahar bosqichi 20-maydan 12-iyunga qadar bo‘lib o‘tdi.
Kichik biznes va xususiy tadbirkorlik, fermerlik harakatini qo‘llab-quvvatlash, milliy hunarmandchilikni rivojlantirishga qaratilgan ko‘rik-tanlov O‘zbekiston Savdo-sanoat palatasi, Fermer, dehqon xo‘jaliklari va tomorqa yer egalari kengashi, “Hunarmand” uyushmasi va Yoshlar ittifoqi tomonidan an’anaviy ravishda har yili o‘tkazib kelinmoqda.
Tanlov quyidagi asosiy nominatsiyalar bo‘yicha o‘tkazilmoqda va tanlovning respublika bosqichi mutlaq g‘oliblari Prezident sovrini Spark avtomashinasi bilan taqdirlanadi:
“Sanoat sohasida yilning eng yaxshi tadbirkori”;“Xizmat ko‘rsatish sohasida yilning eng yaxshi tadbirkori”;“Yilning eng yaxshi yosh tadbirkori”;“Yilning eng yaxshi fermeri”;“Yilning eng yaxshi hunarmandi”.
Shuningdek, tanlov ishtirokchilari 11 ta qo‘shimcha nominatsiya bo‘yicha mukofotlanadi.G‘olib va sovrindorlar nomi 22-iyun kuni ma’lum qilinadi va taqdirlash marosimi o‘tkaziladi.
Izoh (0)