“Shaytanat” serialida Anvar, “Kichkina tabib” filmida Shavkat, “Oyijon” filmida esa Akbar roli bilan tanilgan aktyor Bahrom Matchonov 17 yildan so‘ng O‘zbekistonga qaytib, ‘Ibrat’ filmida suratga tushmoqda.
Aktyor Bahrom Matchonov “Daryo” internet-nashri uchun eksklyuziv intervyu berdi. Intervyuni jurnalist Feruz Muhammad tashkillashtirdi.
Suhbat davomida aktyor 17 yil davomida AQShda yashab, birorta filmda suratga tushmagani sabablari haqida gapirib berdi.
Tasavvur qiling, amerikalik aktyor O‘zbekistonga keldi, o‘zbek filmida o‘ynamoqchi. Unga bir epizodik rol berildi ham deylik, xo‘sh, keyin-chi? Esingizda bormi, ‘Kichkina tabib’ filmida kasal yotgan qizaloqning uyiga fransuz shifokori keladigan joyi bor. O‘sha odam shu birgina va kichkinagina epizodda o‘ynadi. Boshqa joyda, boshqa filmlarda shu shifokorni ko‘rdingizmi? To‘g‘ri, u odam aktyor ham emasdi, elchixonada ishlardi. Lekin aktyor bo‘lgan taqdirda ham shu kichik epizoddan nariga o‘tolmasdi-da...Men nima demoqchiman? Amerikada aktyorlari juda ko‘p. O‘sha yerda tug‘ilib o‘sgan, tili, mentaliteti to‘g‘ri keladi. Menimcha, Los-Anjelesning yarmi aktyor. Men borib kimni o‘ynayman? O‘zlari rol topa olmayapti-ku?! Men nima qilaman, 3-qatorda ‘massovka’da turamanmi? Biror syomkada mashhur aktyor Bred Pitt o‘tib ketayotgan bo‘lsa, men orqa planda turib bo‘lsayam, internetga ‘Bred Pitt bilan birga suratga tushganman’, deb yozishim kerakmi? Bu narsa menga uyat, qiziq ham emas. ‘Gollivudda yuribman’, degan nom uchun bormayman-ku?! Bunda mantiq yo‘q.
Bahrom Matchonov, aktyor
Izoh (0)