Toshkent shahar davlat soliq xizmati organlari tomonidan jismoniy va yuridik shaxslarning soliq qarzini undirishga qaratilgan keng qamrovli tadbirlar amalga oshirilmoqda. Bu haqda davlat soliq qo‘mitasi matbuot xizmati “Daryo”ga xabar berdi.
Xususan, poytaxtda soliq qarzdorligini qisqartirish bo‘yicha o‘tkazilgan tadbirlar davomida 1560 nafar yakka tartibdagi tadbirkorning 21 milliard so‘m, 3 ming 250 nafar fuqaroning 1,7 milliard so‘m soliq qarzi undirildi.
Tahlillarga ko‘ra, bugungi kunda eng ko‘p qarzdorlik qurilish faoliyati bilan shug‘ullanuvchi korxonalar hissasiga to‘g‘ri kelmoqda. Jumladan, joriy yilning o‘tgan davrida joylarda o‘tkazilgan tadbirlar davomida 12 ming 765 ta qarzdor korxonaning 487,6 milliard so‘mdan ziyod soliq qarzi undirilgan bo‘lsa, shundan 174,8 milliard so‘mi aynan qurilish korxonalari hissasiga to‘g‘ri kelmoqda.
Misol uchun, poytaxtning Chilonzor tumanida ro‘yxatdan o‘tgan “Ko‘prikqurilishbutlash” korxonasi rahbarlarining loqaydligi sabab to‘planib qolgan 1,2 milliard so‘mlik soliq qarzi majburiy undiruvga qaratilib, sud qarori asosida undirildi.
Xuddi shuningdek, Mirzo Ulug‘bek tumanida ro‘yxatdan o‘tgan “Toshkent issiqlik markazi” davlat unitar korxonasining soliq va boshqa majburiy to‘lovlardan bo‘lgan qarzi oylar davomida to‘planib qoldi.
Tuman davlat soliq inspeksiyasining bir necha bor ogohlantirishiga qaramay, soliq qarzdorligi bartaraf etilmadi. Pirovardida 3,2 milliard so‘mlik qarzdorlik korxonaning debitorlari hisobidan inkasso topshiriqnomasi asosida undirib olindi.
Izoh (0)