Ijtimoiy tarmoqlarda tarqatilgan xabarlarda bildirilishicha, Turkiya Migratsiya idorasi eski biometrik pasportlarga ega O‘zbekiston fuqarolar uchun mazkur mamlakatda vaqtincha turish hujjatini 2019-yilning 1-noyabr kunigacha bo‘lgan muddatga rasmiylashtirmoqda. Undan keyingi muddatlar uchun yangi biometrik (qizil rangli) pasportlar talab etilmoqda.
O‘zbekistonning Turkiyadagi elchixonasiga ko‘ra, O‘zbekiston fuqarosining biometrik pasporti (yashil rangli) Turkiyada bo‘lish va harakatlanish uchun mazkur pasportning amal qilish muddati tugaguniga qadar haqiqiy hisoblanadi. Bu haqda Turkiyaning tegishli mutasaddi tashkilotlari O‘zbekistonning Anqaradagi elchixonasi tomonidan Turkiya TIV orqali rasman xabardor qilingan.
Mazkur masalada muammo chiqqan holatlarda fuqarolarni elchixona konsullik bo‘limiga murojaatlari asosida konsullik bo‘limi Turkiyaning tegishli idoralari bilan qo‘shimcha tarzda aloqaga kirishi natijasida ko‘p hollarda masala ijobiy hal etilgan. Shu bilan birga, Turkiyada bo‘lish va harakatlanish uchun mazkur pasportning amal qilish muddati tugaguniga qadar haqiqiy hisoblanishi to‘g‘risida Turkiya Tashqi ishlar vazirligiga takroran rasmiy nota yuborilgan.
Zikr etilgan xabarlarda keltirilgan “O‘zbekistonning Turkiyadagi elchixonasi tomonidan noto‘g‘ri nota yuborilgan”, “eski biometrik pasportlar muddati tugaguncha amalda bo‘lishi turk tomoniga bildirilmagan”, “yangi nota yuborish uchun Ramazon ta’tillarining o‘tishi kutilgan” kabi iddaolar haqiqatga zid.
Hozirda O‘zbekistonning Turkiyadagi elchixonasi ushbu masalaga oydinlik kiritish maqsadida Turkiyaning tegishli idoralari bilan muzokaralar olib bormoqda.
Bu jarayon davomida foydalanish uchun O‘zbekistoning Turkiyadagi elchixonasi tomonidan mamlakatning tegishli idoralariga taqdim etish mumkin bo‘lgan rasmiy ma’lumotnoma tayyorlangan. Uni fuqarolar tegishli idoralarda erkin qo‘llashi mumkin.
Zarurat tug‘ilgan hollarda fuqarolar Anqaradagi elchixona konsullik bo‘limiga yoki Istanbuldagi bosh konsulxonaga bevosita murojaat qilishi mumkin.
Izoh (0)