O‘zbekistonda o‘zboshimchalik bilan qurilish ishlarini olib borgan fuqarolar javobgarlikka tortiladi

O‘zbekiston Ma’muriy javobgarlik to‘g‘risidagi kodeksining shaharsozlik to‘g‘risidagi qonun hujjatlarini buzishga nisbatan javobgarlikni nazarda tutuvchi 99-moddasiga o‘zgartirishlar kiritildi, deya xabar berdi Norma.

Unga ko‘ra, shaharsozlik to‘g‘risidagi qonun hujjatlarini buzganlik uchun fuqarolarga ham eng kam oylik ish haqining 5 baravaridan (1 013 000 so‘mdan) 10 baravarigacha (2 027 300 so‘mgacha) jarima jazosi belgilandi. Ilgari faqat mansabdor shaxslar uchun javobgarlik mavjud edi.

Shuningdek, binokorlik materiallarini, konstruksiyalarini va buyumlarini ishlab chiqarishda texnik reglamentlar talablarini buzganlik uchun mansabdor shaxslarga eng kam ish haqining 20 baravaridan (4 054 600 so‘mdan) 30 baravarigacha (6 081 900 so‘mgacha) jarima jazosi kiritildi.

Endilikda fuqarolar tomonidan o‘zboshimchalik bilan egallab olingan yer maydonlarida qurilish ishlarini olib borish:

• fuqarolarga eng kam oylik ish haqining 70 baravaridan (14 191 100 so‘mdan) 100 baravarigacha (20 273 000 so‘mgacha);
• mansabdor shaxslarga eng kam oylik ish haqining 100 baravaridan (20 273 000 so‘mdan) 150 baravarigacha (30 409 500 so‘mgacha) jarima solishga sabab bo‘ladi.