Rossiyada o‘zbekistonlik 3 yoshli bola derazadan tushib ketib, halok bo‘lgani haqida OAVlarda e’lon qilingan xabar O‘zbekiston Tashqi ishlar vazirligi (TIV) tomonidan tasdiqlandi.
Ma’lum bo‘lishicha, voqea 2019-yilning 1-may kuni Rossiyaning Leningrad viloyati Vsevolojsk shahrida sodir bo‘lgan. Bola uyning 4-qavatida joylashgan xonadon derazasidan yiqilib tushish oqibatida vafot etgan.
Mazkur xabar Leningrad viloyatining tergov organlari tomonidan tasdiqlangan hamda O‘zbekistonning Sankt-Peterburg shahridagi Bosh konsulxonasi tomonidan nazoratga olingan.
“Konsullik-huquqiy departamenti marhumning oila a’zolari va yaqinlariga ta’ziya bildiradi”, — deyiladi vazirlik axborotida.
Rossiyaning Shimoli-g‘arbiy federal okrugi (Arxangelsk viloyati, Kaliningrad viloyati, Kareliya Respublikasi, Komi Respublikasi, Leningrad viloyati, Murmansk viloyati, Nenets avtonom okrugi, Novgorod viloyati, Pskov viloyati, Sankt-Peterburg shahri, Vologda viloyati) hududida joylashgan o‘zbekistonliklar zarur vaziyatlarda O‘zbekistonning Sankt-Peterburg shahridagi Bosh konsulxonasiga quyidagi telefon raqami orqali murojaat qilishlari mumkin: +7-965-029-41-49.
Izoh (0)