28-aprel kuni “Vaqf” fondi rahbari Iskandar Xalilov tabiiy ofat tufayli uyidan ayrilgan oilalar holidan xabar olish uchun Qashqadaryo viloyati Qamashi tumaniga bordi. Bu haqda “Vaqf” xayriya jamoat fondi matbuot xizmati xabar berdi.
O‘tgan haftada O‘zbekistonda kuchli yog‘ingarchilik natijasida sodir bo‘lgan sel toshqini tufayli ayrim viloyatlarda bir necha xonadonlar zarar ko‘rdi. Yomg‘ir suvlari tomorqalardagi ekinlar va chora hayvonlariga ziyon yetkazdi. Yuzaga kelgan holatlarni bartaraf etish maqsadida, turli tashkilotlar tomonidan kuch-vositalari jalb qilinib, ko‘rilgan talofatlarni bartaraf etish choralari va moddiy-ma’naviy ko‘maklar berilmoqda.
Qashqadaryo viloyati Qamashi tumani 25 ta aholi xonadonlarining yordamchi uylariga va hovlisiga sel suvlari talofat yetkazgan. Mana shunday tabiiy ofatlardan biri Qamashi tumani, Qizil ko‘l qishlog‘ida istiqomat qiluvchi ikki nafar oila – Rahimov Sobir hamda Norchayeva Irodaning xonadonidir. Suv toshqini oqibatida bu ikki oila o‘z xondonlaridan butkul ayrilgan.
“24-aprel kuni qo‘y-qo‘zilarni o‘tlatish maqsadida, adirlik tomon haydab bordim. Tungi soat ikkilar chamasi ayolim qo‘ng‘iroq qilib, uyga eshikdan suv kirayotgani haqida xabar berdi. Shoshgancha kelsam, uyimiz eshigidan kirgan suv tizzadan oshgan. Bir amallab uy ichkarisida qolgan ayolim va ikki qizimni olib chiqdim. Biroz vaqtdan so‘ng uyimiz butunlay vayron bo‘lib, bir uyum loyga aylandi. Hatto, hujjatlarimizni ham olishga ulgurmadik”, –– deydi Qamashi tumani Qizilko‘l qishlog‘ida istiqomat qiluvchi Rahimov Sobir.
Tabiiy ofat Qamashi tumani Karvon qishlog‘idagi yana bir oila boshiga tashvish olib keldi. Voyaga yetmagan to‘rt nafar farzandi bor Norchayeva Irodaning turmush o‘rtog‘i tayinli ishda ishlamaydi. Asosan mavsumiy mehnat orqali kun kecharayotgan oila bir necha yillar davomida qiyinchilik bilan 3 xonali uyni qurib bitkazdi. Aksiga olib uy devori paxsadan bo‘lgani sabab qattiq yomg‘ir natijasida, qishloq yonidan oqib o‘tayotgan kanalga kelgan sel kanaldan toshib chiqib, Norchayevlar xonadonini vayronaga aylantirdi.
“Vaqf” xayriya jamoat fondi rahbari o‘z uylaridan ayrilgan ushbu ikki xonadon ahliga qisqa muddat ichida qurib bitkaziladigan yangi xonadonlar uchun moddiy ko‘mak ko‘rsatilishini ta’kidladi.
Izoh (0)