Bir hafta avval internet tarmoqlarida Dehqonobod tumanining Oqrabot qishlog‘i hududidagi avtomobil yo‘lining o‘pirilib tushgani aks etgan suratlar tarqalgandi. Qashqadaryo yo‘llardan muntazam foydalanish unitar korxonasiga qarashli 161-yo‘l bo‘limi boshlig‘i Norqul Ko‘chimov bergan ma’lumotlarga ko‘ra, Oqrabotdagi o‘pirilib tushgan yer M39 avtomobil yo‘lining 1308-kilometri bo‘lgan. “Daryo” muxbirining xabariga ko‘ra, 21-aprel kuni kechki payt M39 Toshkent—Termiz avtomobil yo‘lining 1320-kilometrida ham yer o‘pirilib tushgan. M39 yo‘lining 1320 kilometri Boysun tumani hududi hisoblanadi.
“Daryo” muxbirining 19-aprel kuni Surxondaryo viloyatiga safari chog‘idagi kuzatuvlariga ko‘ra, qariyb 150 metr balandlikda joylashgan avtomobil yo‘lining bir qismi o‘pirilib, siljib tushayotgan bo‘lgan.
Ma’lum bo‘lishicha, asfalt yo‘lning ustida “buloqcha” ko‘z ochib, suv oqishni boshlagan. O‘sha buloqning ko‘z ochishi ayni hududning 21-aprel kuni o‘pirilib tushishiga sabab bo‘lgan.
“Daryo” manbasi yetkazgan suratlardan hududdagi yo‘lning o‘pirilib tushgani va ayni paytda yo‘lning qatnov qismi juda torayib qolganini ko‘rish mumkin.
Qatnov yo‘lining torayishi oqibatida katta jarlik yuzaga kelgan. Beton to‘siqlar bilan to‘sib qo‘yilgan yo‘lda ayni damda hech qanday ta’mirlash ishlari olib borilmagan ko‘rinadi.
“O‘zgidromet” ma’lumotiga ko‘ra, aprel oyida Boysun tumanida ikki sutka davomida yoqqan yomg‘ir miqdori deyarli ikki oylik me’yordan oshib ketgan.
Izoh (0)