Farg‘ona viloyati IIB matbuot xizmatining “Daryo”ga ma’lum qilishicha, Bog‘dod tumani Samandarak qishlog‘ida yashovchi 10 nafar yigit Farg‘ona shahrida yashovchi tanishlari U.Yunusov taklifi bilan 28-yanvar kuni Rossiyaning Penza shahriga qurilish obyektlarida ishlash uchun borgan. U yerda yigitlarni U.Yunusovning ukasi T.Yunusov kutib olib, Roman ismli qurilish obyekti rahbarining qo‘lida ishlashlarini, ish haqlarini olishda o‘zi o‘rtada turishini aytgan. Yigitlarning fuqarolik pasportlarini esa vaqtinchalik ro‘yxatga qo‘ydirish bahonasida olib qo‘ygan.
Yigitlarga ishga borishdan avval 45–60 ming Rossiya rubli miqdorida ish haqi berilishi va’da qilingan edi. Biroq ular Penza shahriga borganidan keyin ish haqini 38 ming rubldan berilishi, ish vaqti ham oldindan aytilganday 8 soat emas, 12–14 soat ekanligi ma’lum bo‘lgan. Yigitlar bunga rozi bo‘lmay, ishlash uchun boshqa joyga ketmoqchi bo‘lib, fuqarolik pasportlarini so‘rashgan. Ammo T.Yunusov hamda Roman ismli ish beruvchi turli bahonalar bilan 2 oy davomida ularga fuqarolik pasportlarini bermay kelgan.
Yigitlar 2 oy davomida ishga chiqmay, ish haqi ham olmay, qarzga botib, yashash manziliga qaytolmay, qiyin ahvolda qolgan hamda ota-onalari orqali viloyat IIBdan yordam so‘ragan.
Farg‘ona viloyati IIB Terrorizm va ekstremizmga qarshi kurashish boshqarmasi odam savdosi va noqonuniy migratsiyaga qarshi kurashish bo‘limi xodimlarining “Istiqbolli avlod” markazi bilan hamkorlikda olib borgan sa’y-harakatlari natijasida yigitlarning barchasi fuqarolik pasportlarini olgan holda O‘zbekistonga qaytarildi.
Izoh (0)