Toshkentda Prezident maktabi qurilishi boshlandi

Joriy yilda Qoraqalpog‘istonning Nukus hamda Xorazmning Xiva shahrida Prezident maktablarining qurilish ishlari boshlangan edi. Аyni paytda Toshkentning Mirzo Ulug‘bek tumanida ham Prezident maktabini qurish ishlari olib borilmoqda. Bu haqda O‘zA xabar berdi.

O‘zbekiston Prezidenti Shavkat Mirziyoyev joriy yilning 20-fevralida “Prezident maktablarini tashkil etish to‘g‘risida”gi qarorni imzolagan edi. Hujjatga ko‘ra, Prezident maktablari mamlakatning barcha hududlarida bosqichma-bosqich tashkil etiladi.

Mazkur maktablarga qabul Xalq ta’limi vazirligi tomonidan ta’lim muassasalarining 4-sinf bitiruvchilari orasida belgilangan tartibda o‘tkaziladigan mantiqiy fikrlash testlari, yozma imtihon va suhbat natijalariga ko‘ra amalga oshiriladi. Maktabning yillik qabul kvotasi 24 nafar o‘quvchidan iborat bo‘lib, ikkita sinfga bir xil – 12 nafardan o‘quvchi taqsimlanadi. Birinchi o‘quv yilida esa har bir Prezident maktabining 5-10-sinflariga jami 144 nafar o‘quvchi o‘qishga qabul qilinadi.

O‘quv jarayoni xorijiy ta’lim muassasalari bilan hamkorlikda ishlab chiqilgan o‘quv reja va dasturlari bo‘yicha ingliz tilida amalga oshiriladi va “STEAM – ta’lim” (Science — tabiiy fanlar, Technology — texnologiya, Engineering — texnik ijodkorlik, Art – san’at, Mathematics — matematika) dasturi asosida olib boriladi.

Prezident maktabining 9-11-sinflarida ta’lim olish o‘quvchilarning qiziqishiga ko‘ra ayrim fanni tanlash va ularni o‘rganish darajasini inobatga olgan holda individual o‘quv jarayoni asosida amalga oshiriladi.

Xalq ta’limi vazirligidan olingan ma’lumotlarga ko‘ra, Prezident maktablari bitiruvchilari belgilangan tartibda davlat tomonidan tasdiqlangan shahodatnoma, attestat bilan bir qatorda, xalqaro darajadagi tegishli dastur diplomi (International Baccalaureate, Advanced Placement yoki International Advanced Levels)ga ega bo‘ladi. Bu esa o‘z navbatida xorijiy oliy o‘quv yurtlariga kirish imkonini beradi.

Kembrij Universitetining Cambridge Assessment International Education brendi ostida faoliyat yurituvchi Imtihon Kengashi Prezident maktablariga qabul imtihonlarini tashkil etishi kutilmoqda.

Bu kabi sa’y-harakatlar yuksak bilimli, keng fikrli, vatan taqdiriga daxldor avlodni voyaga yetkazish maqsadida amalga oshirilmoqda.