O‘zbekiston Milliy olimpiya qo‘mitasi prezidenti, O‘zbekiston futbol assosiatsiyasi birinchi vitse-prezidenti Umid Ahmadjonov yaqinda Toshkentning “Lokomotiv” klubida ish boshlagan terma jamoa sobiq murabbiyi Samvel Babayan haqida keskin fikrlar bildirdi, deb yozadi “Sports.uz”.
Yaxshilikka yomonlik bo‘lib qoldi. Xorijga ketgani uchun birovning rizqini qiymaylik deb yaxshilik qilsak, u darrov boshqacha o‘yin qildi. Agar Babayanning subuti bo‘lganida edi, u O‘zbekistonga qaytib kelmagan bo‘lardi.Ma’lumot uchun, Samvel Babayan O‘FF (hozir O‘FA) Ijroiya Qo‘mitasi Byurosining 2018-yil 15-yanvardagi 3-sonli qaroriga muvofiq futbolga aloqador har qanday faoliyat bilan shug‘ullanishdan umrbod chetlashtirilgan edi. Keyinroq mutaxassis Latviyada ish boshlagach, tashkilot bu qarorning faqat O‘zbekistonda amal qilishini ma’lum qilgandi.Odamlar orasida esa turli mish-mishlar tarqalib ketdi. O‘FA bularning barchasidan xabardor. Prezidentimiz ham kechirimli bo‘lish kerakligini aytgan edilar, biz ham shunday yo‘l bilan uni kechirgan edik. Shunisi aniqki, men o‘z lavozimimda ekanman Babayanni O‘zbekiston futbol assotsiatsiyasi yoniga ham yaqinlashtirmayman.
Umid Ahmadjonov, O‘zbekiston futbol assosiatsiyasi birinchi vitse-prezidenti
Ammo Babayan 2019-yilning 2-fevral kuni “Lokomotiv” futbol klubi prezidenti Mansur Rajabovning maslahatchisi etib tayinlandi. Bu orada esa unga nisbatan O‘FA tomonidan ochilgan ish 2018-yilning 1-fevral kuni yopilgani hamda uning diskvalifikatsiyasi bekor qilingani oshkor qilindi. Qizig‘i, Babayan chetlatilishi bekor bo‘lishiga “Bunyodkor” tomonidan berilgan kafolat xati sabab bo‘lgani aytildi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)