“Nabirasini itarib yubordi, ammo o‘zi ulgurmadi”: Tomskda muz bo‘lagi keksa ayolning o‘limiga sabab bo‘ldi

Tomskda muz bo‘lagi buvi va nabiraning ustiga tushib ketgan, deya xabar beradi “Vesti.ru”.

Ayol voqea joyida vafot etgan, besh yashar qizcha esa jarohat olgan va kasalxonaga yuborilgan.

Voqea 28-mart kuni kunduzi ro‘y bergan.

“Bola bilan bo‘lgan ayol nabirasini itarib yubordi, o‘zi esa ulgurmadi” — deydi guvohlardan biri. Voqea joyiga yetib kelgan shifokorlar o‘lim holatini qayd etgan.

Hodisa joyida darhol qor ko‘chishi haqida e’lonlar paydo bo‘lgan. Shahar hukumati hodisaga operativ tarzda reaksiya bildirgan: merning talabiga binoan Tomsk kommunal xizmatlari kecha-yu kunduz ish tartibiga o‘tgan. Tuman rahbarlariga barcha binolarning tomlarini, shiftlarini tekshirish buyurilgan.

Tergov qo‘mitasi bu hodisa yuzasidan  jinoiy ish qo‘zg‘agan.