Bugun, 27-mart kuni Samarqand viloyatida “Mahmud az-Zamaxshariy va uning al-Kashshof asari” mavzusidagi ilmiy-amaliy seminar doirasidagi tadbirlar boshlandi, deb xabar berdi O‘zbekiston musulmonlari idorasi matbuot xizmati.
Avval muftiy hazratlari boshchiligida taniqli ulamolar, bosh imom-xatiblar, tajribali imom-xatiblar va madrasalar mudirlari Imom Buxoriy yodgorlik majmuasini ziyorat qildi.
Tashrif avvalida Qur’oni karim oyatlari tilovat qilinib, savobi Imom Buxoriy ruhi poklariga baxshida etildi.
Shundan so‘ng seminar ishtirokchilari Prezident tashabbusi bilan tashkil etilgan Hadis ilmi maktabi faoliyati bilan yaqindan tanishdi. Oliy maktabning o‘qituvchi va mutaxassislari tomonidan ilm dargohida muhayyo qilingan shart-sharoitlar, ta’lim-tarbiya jarayonlarini olib borish uslublari, axborot resurs markazi, zamonaviy axborot texnologiyalaridan foydalanish metodlari, jismoniy tarbiya va sport bilan shug‘ullanish imkoniyatlari to‘g‘risida batafsil ma’lumot berdi.
Tanishuv jarayonida mehmonlar O‘zbekistonda diniy-ma’rifiy sohani yanada takomillashtirish, muborak islom dinining sofligini asrash, uning asl insonparvarlik tamoyillarini ochib berish va keng targ‘ib etish, bu borada malakali kadrlar tayyorlash masalalariga alohida e’tibor qaratilayotgani va tizimli islohotlar olib borilayotganini alohida ta’kidladi.
“Mahmud az-Zamaxshariy va uning al-Kashshof asari” mavzusidagi ilmiy-amaliy seminar o‘z ishini boshladi.
Izoh (0)