Qarshi shahrida bitum va qo‘shimcha dizel yoqilg‘isini ishlab chiqaruvchi “Karshi-bitum” zavodi qurilishi boshlab yuborildi. 24-mart kuni viloyat hokimi Zafar Ro‘ziyev va xorijlik investorlar zavod tamal toshini qo‘ydi. Bu haqda “Daryo”ga viloyat hokimligi matbuot xizmati rahbari Bekzod Mamatqulov ma’lum qilmoqda.
Ma’lum bo‘lishicha, “Karshi-bitum” mas’uliyati cheklangan jamiyati shaklidagi qo‘shma korxona O‘zbekiston Respublikasi “Minora qurish ekspeditsiyasi” aksiyadorlik jamiyati va Rossiyaning “Kaylas” mas’uliyati cheklangan jamiyati ishtirokida hamkorlik aloqalari asosida ta’sis etilgan. “Minora qurish ekspeditsiyasi” aksiyadorlik jamiyati neft va gaz sohasidagi burg‘ulash minoralari qurish, ko‘chirib o‘tish va burg‘ulash uskunalarini tashish ishlarini amalga oshirsa, “Kaylas” mas’uliyati cheklangan jamiyati ishlab chiqarish va savdo sohasida investitsion faoliyatni amalga oshiradi.
Bekzod Mamatqulovga ko‘ra, zavod qurilishining birinchi bosqichi 2019-yilning dekabr oyida yakunlanishi rejalashtirilgan bo‘lib, qurilish loyihasining umumiy qiymati 16 million dollarga teng. Shundan xorijiy investitsiyalar ulushi 14 million dollarni tashkil qiladi. Zavodning asosiy ish faoliyati og‘ir neft va neft mahsulotlarini qayta ishlash natijasida undan, bitum va qo‘shimcha dizel yoqilg‘isi ajratib olishdan iborat.
— Rejadagi loyihaga ko‘ra “Karshi-bitum” neftni qayta ishlash zavodi yiliga 150 ming tonna neftni qayta ishlash quvvatiga ega bo‘lib, ushbu loyiha asosida 300 ta yangi ish o‘rni yaratilishi ko‘zda tutilgan, — deydi shahar hokimi o‘rinbosari Anvar Qobilov. — Bu esa respublikamiz miqyosida qo‘shimcha ish o‘rinlari yaratilishiga va yo‘l qurilishi sohasida xomashyo ta’minotiga katta hissa qo‘shadi.
Matbuot xizmati xabariga ko‘ra, joriy yil viloyat hokimligi ko‘magi bilan Rossiya, Janubiy Koreya, Xitoy, Belarus kabi ko‘plab davlatlar bilan turli sohalarda hamkorlik bo‘yicha samarali kelishuvlarga erishildi. Birgina Qarshi shahrida keyingi ikki oyda 10 ta qo‘shma korxona ishga tushirildi.
Izoh (0)