O‘zbekistonning “Saqil” ansambli Tehron shahrida Fajr musiqa festivalida ishtirok etib, eronlik musiqa shinavandalariga o‘zbek mumtoz va milliy cholg‘u kuylarini taqdim etdi. Bu haqda O‘zA ma’lum qildi.
Ansambl dasturidan Shashmaqom, Farg‘ona—Toshkent maqom yo‘llaridagi asarlar bilan bir qatorda mumtoz yo‘nalishdagi xalq kuylari hamda bastakorlik asarlari ham o‘rin oldi.
Ansambl rahbari, O‘zbekistonda xizmat ko‘rsatgan artist Abdurahmon Xoltojiyevning chang, O‘zbekiston xalq artisti Abdulahad Abdurashidovning nay, O‘zbekistonda xizmat ko‘rsatgan artist O‘tkir Qodirovning g‘ijjak sozida ijro qilgan asarlari muxlislar e’tirofga sazovor bo‘ldi.
“Saqil” ansambli 2018-yilda Shahrisabzda ilk bor tashkillashtirilgan xalqaro maqom san’ati forumining “Eng yaxshi maqom ansambli“ nominatsiyasi sohibi bo‘lib, jamoaning Fajr festivalidagi ishtiroki OXUS Culture jamiyatining festival tashkilotchilari bilan hamkorligi asosida amalga oshirildi.
Ma’lumot uchun, har yili fevral oyida tashkillashtiriladigan va bu yil 34-bor o‘tkazilgan mazkur festivalga turli musiqiy yo‘nalishlarda ijod qilayotgan Eron va xorij musiqiy jamoalari taklif etiladi.
Izoh (0)