2019-yil 14-yanvar kuni Pokiston oliy harbiy qo‘mondonligi tashabbusi bilan mamlakat Qurolli Kuchlari Birlashgan shtabida ikki tomonlama munosabatlar amaliyoti va tarixida ilk bor O‘zbekiston davlat bayrami — Vatan himoyachilari kuni tantanali ravishda nishonlandi. Bu haqda TIV matbuot xizmati ma’lum qildi.
Tadbir yuqori darajada tashkil etildi. O‘zbekiston Qurolli kuchlari va Pokistondagi elchixona delegatsiyasi sharafiga harbiy orkestr va faxriy qorovul saf tortdi.
Pokiston tomoni harbiy va harbiy-texnikaviy hamkorlik bo‘yicha o‘zaro munosabatlarning rivojlanishi, shuningdek, O‘zbekiston Qurolli Kuchlarining zamonaviy tayyorgarligi bo‘yicha batafsil videorolik taqdim etdi.
Tadbir doirasida Pokiston Qurolli Kuchlarining qo‘shma shtabi tomonidan shtab shaxsiy tarkibi ishtirokida rasmiy qabul marosimi o‘tkazildi.
Suhbat chog‘ida ikki qardosh xalqlar o‘rtasida harbiy hamkorlikni yanada mustahkamlanishi uchun bugungi kunda yangi imkoniyatlar ochilayotganligi ta’kidlandi.
O‘zbekiston elchixonasi davlat bayrami — Vatan himoyachilari kuniga hurmat ko‘rsatilganligi uchun Qurolli Kuchlar qo‘shma shtabi rahbariyatiga minnatdorlik izhor etdi. Tadbir O‘zbekiston va Pokiston o‘rtasidagi munosabatlarning yangi bosqichga ko‘tarilganligining yorqin ramzi bo‘ldi va tomonlarning do‘stlik asosida hamkorlikni rivojlantirishga tayyorligini tasdiqladi.
Izoh (0)