Kutubxonaning 100 yilligi munosabat bilan tashkil etilgan tantanali tadbirda tizimga aloqador xodimlar, yozuvchi va shoirlar, jamoatchilik vakillari, kitobxon yoshlar ishtirok etdi. Bu haqda O‘zA xabar berdi.
Tadbirda dastlab kitob va kutubxonaning insoniyat hayotidagi beqiyos roli, jamiyat taraqqiyotidagi o‘rni, shuningdek, bir asrdan buyon viloyat ahli, ziyolilar, yoshlarning ma’naviy ehtiyojiga xizmat qilib kelayotgan mazkur kutubxonaning ahamiyati ta’kidlandi, uning tarixiga doir muhim va qiziqarli ma’lumotlar berildi.
O‘z faoliyatini 540 dona kitob bilan boshlagan mazkur ziyo maskani bugungi kunda 600 mingdan ziyod kitob fondiga ega. Bundan tashqari, viloyat kutubxonasi xazinasida jami 5 million 205 ming dona kitob, 380 ming dona elektron resurs, 252 ming dona “MARS” yozuvlar jamlanmasi mavjud ta’lim muassasalari kutubxonalari, axborot resurs markazlarining uslubiy markazi hisoblanadi.
O‘tgan yilda ushbu ziyo maskani tomonidan 665 ming 543 nafar kitobxonga xizmat ko‘rsatilgan bo‘lsa, yakunlanayotgan yilda bu ko‘rsatkich 26 foizga o‘sdi. Axborot kutubxona markazlariga qatnab ro‘yxatdan o‘tgan foydalanuvchilar soni 1 million 50 ming 701 nafarni tashkil qildi.
1918-yilda asos solingan ushbu ziyo maskaniga atoqli davlat va jamoat arbob, adib Sharof Rashidov tashabbusi 1980-yilda mana shu muhtasham yangi bino qurib berilgan. Uning ochilish marosimida Sharof Rashidovning o‘zi ham ishtirok etib, kutubxonani mumtoz shoiramiz Nodirabegim nomi bilan atashni taklif etganliklarini hamon faxr bilan eslab yuramiz, – deydi kutubxona rahbari M. Jo‘raboyeva.
Izoh (0)