Namanganda xo‘roz urishtirish o‘yini tashkil qilgan fuqaroga 3 yil sinov muddati tayinlandi. Bu haqda “Daryo”ga jinoyat ishlari bo‘yicha Namangan shahar sudi sudyasi Sultonmaqsud Xolbotirov ma’lum qildi.
Sudlanuvchi Qodir Anvarov (ism-shariflar shartli) Namangan shahrining “Bunyodkor” mahallasidagi g‘isht xumdonida Mardon Yoqubov bilan kelishgan holda xo‘roz urishtirish o‘yini tashkil etadi. O‘yinni ko‘rgani kelganlarning har biriga 10 ming so‘mdan chipta sotiladi.
Bundan xabar topgan IIB xodimlari ushbu manzilga kelib, M.Yoqubovni qo‘lga oladi. Q.Anvarov esa boshqa tomoshabinlar qatori uyiga ketadi. Mazkur holat yuzasidan Jinoyat kodeksining 278-moddasi 1-qismi bilan jinoyat ishi ochilib, tergov harakatlari olib borilgan. Bu orada M.Yoqubovning ko‘rsatmasiga asosan Q.Anvarov ham javobgarlikka tortiladi, biroq u allaqachon g‘oyib bo‘lishga ulgurgandi.
Tergov ishi davomida Q. Anvarovning qismi alohida ajratilib, unga nisbatan qidiruv e’lon qilinib, avgust oyida sirtdan qamoqqa olish ehtiyot chorasi qo‘llandi. Jinoyat ishlari bo‘yicha Kosonsoy tuman sudi tomonidan M.Yoqubovning jinoyat ishi ko‘rib chiqilib, unga nisbatan shartli hukm qilinib, bir yil sinov muddati belgilandi.
Shundan so‘ng Q. Anvarovni qidiruv ishlari boshlanadi. Surishtirishlar natijasida uning Rossiyada ekanligi aniqlanadi. U O‘zbekistonga qaytib kelgandan so‘ng 9-sentabr kuni ushlanib, qamoqqa olinadi.
Sudda Q. Anvarov aybiga iqror bo‘lmadi. Uning ko‘rsatmasiga ko‘ra, M.Yoqubov bilan shunchaki tanish bo‘lgan. Xo‘roz urishtirish o‘yinini tomosha qilgani chiqqanida ichki ishlar xodimlari kelgan vaqt boshqalar qatori uyiga qaytgan. U oradan uch-to‘rt kun o‘tgach Rossiyaga ishlagani ketgani, oilada yagona boquvchiligi, ikki nafar voyaga yetmagan farzandi borligini bildirdi.
Sud jarayoniga guvoh tariqasida jalb qilingan M.Yoqubov esa bu ko‘rsatmalarga qarshi guvohlik berdi. Uning aytishicha, joriy yil mart oyida Q.Anvarov uning yoniga kelib, milliy o‘yinlar tashkil qilishini aytib,g‘isht xumdonni ijaraga berishini so‘raydi. Avvaliga u rozi bo‘lmaydi. Q.Anvarov barcha ishlarni qonuniy amalga oshirishiga ishontirgach, M.Yoqubov qarzdorligi borligi uchun taklifga rozi bo‘ladi va barcha ishlarni qonuniy amalga oshirishni tayinlaydi.
Jinoyat ishlari bo‘yicha Namangan shahar sudi sudyasi Sultonmaqsud Xolbotirov ushbu ishni atroflicha o‘rganib chiqib, Qodir Anvarovganisbatan Jinoyat kodeksining 278-moddasi 1-qismi bilan 5 yil muddatga ozodlikdan mahrum etish jazosi tayinladi. Jinoyat kodeksining 72-moddasiga asosan shartli jazo qo‘llanib, 3 yil sinov muddati belgilandi va Anvarov sud zalida qamoqdan ozod etildi.
Sinov muddati davomida Q.Anvarovga oyda ikki bor IIB ro‘yxatidan o‘tish, yashash va ish joyi o‘zgarsa bu haqda xabar berish, qimor o‘yinlari tashkil etiladigan joylar, spirtli ichimlik sotiladigan restoran, bar va kafelarga bormaslik,xo‘roz o‘yinlarida ishtirok etmaslik, ijtimoiy foydali mehnat bilan shug‘ullanish kabi majburiyatlar yuklandi.
Izoh (0)