13-noyabr kuni “Yoshlar ijodiyoti” saroyida Global tadbirkorlik haftaligining ochilish marosimi tashkil etildi. Bu haqda “Daryo” muxbiri Madina Nurman xabar berdi.
Unda O‘zbekiston Respublikasi Prezidentining fan, ta’lim, sog‘liqni saqlash va sport masalalari bo‘yicha davlat maslahatchisi Abdujabbor Abduvohidov, Global tadbirkorlik tarmog‘i vitse-prezidenti Buke Chuxadar, Savdo-sanoat palatasi raisi Adham Ikromov, Bandlik va mehnat munosabatlari vaziri Sherzod Kudbiyev, Tashqi savdo vaziri Jamshid Xo‘jayev va davlat hokimiyati organlarining boshqa mas’ul vakillari kirish so‘zlari bilan ishtirok etdi.
18-noyabrgacha davom etuvchi haftalik O‘zbekiston yoshlar ittifoqi, Xalqaro biznes va texnologiyalar assotsiatsiyasi, O‘zbekiston Savdo-sanoat palatasi va boshqa tashkilotlar bilan hamkorlikda tashkil etildi.
Unda mashg‘ulotlar, taqdimotlar, mahorat saboqlari, turli muhokamalar, onlayn muloqotlar, b2b formatdagi uchrashuvlar, tele-muloqotlar bo‘lib o‘tadi.
Haftalik davomida “Biznes va davlatning o‘zaro muloqoti”, “Business Women’s Gap”, “Tadbirkorlik ekotizimi”, “Ekotizim bo‘yicha xorijdagi tajriba”, “Toshkent – kelajak shahri”, “Ta’lim – millatning taraqqiyot mezoni sifatida”, “Blokcheyn”, “Marketing”, “Alternatus” maydonchasi, “Turizm”, “Startaplar”, “Ko‘chat o‘tqaz!” kabi mavzularda tadbirlar, muloqotlar o‘tkazilishi ko‘zda tutilgan. Shuningdek, Buxoro, Samarqand, Qarshi shaharlarida mohir biznesmenlar ishtirokida mahorat darslari tashkil etish rejalashtirilgan.
Ochilish marosimi yakunida mehmonlar ramziy qizil tasmani kesib, rasman haftalikni ochiq, deb e’lon qildi.
Izoh (0)