10-noyabr, shanba kuni Toshkent hokimligida Transport va yo‘l-transport infratuzilmasini rivojlantirish departamenti rahbariyatining velohamjamiyat vakillari bilan uchrashuvi bo‘lib o‘tdi, deb yozadi “Gazeta.uz”.
Uchrashuvda velotarmoqni rivojlantirish masalalari bilan shug‘ullanish uchun ishchi guruhi tuzish, velosportni targ‘ib etish uchun tadbirlar o‘tkazish, velishering joriy qilish, aholi zich joylashgan joylarda velosipedlar uchun turargohlar tashkil etish mavzulari muhokama qilindi.
Poytaxtda veloharakatni targ‘ib qilish uchun turli tadbirlar, shu jumladan, velopoygalar va festivallar o‘tkazish belgilab olindi. Zarur bo‘lsa, velohavaskorlar qulayligi va xavfsizligi uchun ko‘chalar yopiladi va hududlar ajratiladi.
Jamoatchilik kengashi departamentga shaharda mavjud veloyo‘laklar yuzasidan tanqidlar va takliflarni bildirdi. Ular orasida — jamoat transportini velosipedlarni tashish uchun mahkamlash moslamalari bilan jihozlash hamda ertalabki tig‘iz vaqtgacha va kechki tig‘iz vaqtdan keyin velosipedlarni tashishga ruxsat berish bor.
Toshkentga veloinfratuzilmani rivolantirish konsepsiyasini ishlab chiqish uchun YeXHT hamkorligida chet ellik mutaxassislarni taklif etish taklifi ko‘rib chiqildi.
Izoh (0)