Rossiyalik olim: Global iqlim isishi odamlar va hayvonlarga bevosita ta’sir qilmaydi

Yerdagi global iqlim isishi odam va hayvonlarga to‘g‘ridan-to‘g‘ri ta’sir ko‘rsatmaydi. Bu haqda Rossiya fanlar akademiyasining Sibir bo‘limi qoshidagi neft va gaz geologiyasi va geofizikasi instituti direktorining o‘rinbosari Nikolay Sennikov ma’lum qildi, deb yozmoqda “RIA Novosti”.

Olimning fikricha, dunyo okeani sathining ko‘tarilishi va ba’zi joylarning suv ostida qolishini hisobga olmaganda, iqlim isishi Yerdagi organizmlarning rivojlanishiga zarar yetkazmaydi.

Uning so‘zlariga ko‘ra, agar iqlim isish tomonga harakatlansa, organizmlarning ko‘plab yangi guruhlari paydo bo‘ladi. Ular turli ekologik muhitlarni egallaydi va ularning populyatsiyasi zichligi ortadi. Okeanlar va dengizlarning, shuningdek, o‘rmonlar va qit’alarning biosamaradorligi ortadi, bu esa biosferaga ijobiy ta’sir ko‘rsatadi.