Joriy yilning 15-oktabr kuni Agrosanoat majmuasi va oziq-ovqat ta’minoti sohasidagi loyihalarni amalga oshirish agentligi tomonidan amalga oshirilayotgan “O‘zbekiston Respublikasida chorvachilik tarmog‘ini rivojlantirish” loyihasi doirasida erishilayotgan natijalar bilan tanishish maqsadida Jahon bankining navbatdagi missiyasi O‘zbekistonga tashrif buyurdi. Bu haqda agentlik matbuot xizmati “Daryo” ga xabar berdi.
Mazkur loyiha O‘zbekiston Respublikasi Prezidentining 2017-yil 16-sentabrdagi PP-3283 sonli “Xalqaro tiklanish va taraqqiyot banki va Xalqaro Taraqqiyot Uyushmasi ishtirokidagi O‘zbekiston Respublikasida chorvachilik tarmog‘ini rivojlantirish loyihasini amalga oshirish chora-tadbirlari to‘g‘risida” gi qaroriga muvofiq amalga oshirilib kelinmoqda. Loyihaning umumiy qiymati 150 million AQSh dollarini tashkil etadi.
Loyihaning asosiy maqsadi – qishloq xo‘jalik korxonalari, fermer va dehqon xo‘jaliklariga naslli chorva mollari, qishloq xo‘jalik texnikalari, sut va go‘sht maxsulotlarini qayta ishlash texnologiyalarini xarid qilishlari uchun hamda tovuqchilik, echkichilik, tuyachilik va chorvachilikning boshqa tarmoqlarini rivojlantirishga imtiyozli kredit mablag‘lari ajratishdan iborat.
Loyiha respublikaning barcha hududlarida amalga oshirilmoqda. Imtiyozli kredit mablag‘lari 9 ta tijorat banklari orqali 10 yil muddatgacha (3 yilgacha imtiyozli davr) beriladi.
Tashrif davomida missiya a’zolari Qoraqalpog‘iston Respublikasi, Xorazm, Toshkent va Farg‘ona viloyatlarida loyiha doirasida moliyalashtirilgan chorvachilik yo‘nalishidagi loyihalar bilan tanishishni, hamda qator vazirlik va idoralar bilan tor doiradagi uchrashuvlar o‘tkazishni rejalashtirgan.
Izoh (0)