Adliya vazirining 2018-yil 25-sentabrdagi buyrug‘i bilan O‘zbekiston Respublikasi Adliya vazirligi, Davlat xizmatlari agentligi, Axborot-tahlil multimedia markazi, shuningdek, davlat notarial idoralarining rasmiy ramzi – emblemalari tasdiqlandi. Bu haqda “Daryo”ga Adliya vazirligi Jamoatchilik bilan aloqalar bo‘limi xabar berdi.
Unga ko‘ra:
O‘zbekiston Respublikasi Adliya vazirligining rasmiy ramzi ‒ emblemasi inson huquqlari va qonuniy manfaatlarini himoya qilish ramzini anglatuvchi, pastki qismi cho‘zilgan va yuqori burchaklari kesilgan uchburchak ko‘rinishdagi qalqon shaklida bo‘lib, uni dafna yaproqlari bezab turadi.
Qalqon yuzasi kumush rangda. Qalqondagi sariq ranglar e’tiborni tortuvchi va hushyorlikka chorlovchi rang sifatida ifodalangan.
Qalqon markazida adolat ramzi bo‘lgan tarozi joylashgan. Tarozi adolat, odillik va qonuniylikni anglatadi.
Qalqon ichida ikki yo‘l tasvirlangan bo‘lib, ular adolat va haqiqatga eltuvchi yo‘llarni bildiradi. Yo‘llarning ko‘k rangda tasvirlanishi barcha ezgu ishlarimizni qonun bilan himoya qilinganligini bildiradi. Ushbu yo‘llarni adolat nurlarini ifodalovchi quyosh nurlari yoritib turadi.
Davlat notarial idoralarining emblemasi jigarrang rangdagi oval shaklda bo‘lib, uning ichida bug‘doy boshoqlari, qalqon ichida oltin rangdagi muhr va ruchka tasvirlangan.
Ovalning pastki qismida uning chetidan uchlari chiqib turgan to‘rtburchak ichida oq rangda lotin alifbosida bosh harflar bilan “NOTARIUS” yozuvi mavjud.
Qalqon tasviri notarius tomonidan notarial harakatlarni amalga oshirish yo‘li bilan jismoniy va yuridik shaxslarning huquqlari va qonuniy manfaatlarini himoya qilishni anglatadi.
Bug‘doy boshoqlari notarius kasbining vijdonliligini bildiradi.
O‘zbekiston Respublikasi Adliya vazirligi huzuridagi Davlat xizmatlari agentligining emblemasi hayot, rivojlanish ramzini anglatuvchi, to‘q yashil rangli bir nechta olti qirrali shakllardan iborat bo‘lib, barcha davlat xizmatlarini o‘zida mujassamlashtirgan tuzilmani anglatadi.
Ichki olti burchakli shakllar o‘lchamining turli xil ekanligi Davlat xizmatlari markazlari orqali ko‘rsatiladigan xizmatlarning darajalari har xil ekanligini bildiradi.
Davlat xizmatlari agentligining barcha xizmatlari shaffofligi va o‘zaro bog‘langanligini anglatish uchun ichki shakllar bir tekisda, izchil joylashgan.
Ichki shakllar ranglarining tepadan pastga qarab to‘q rangli bo‘lib borishi davlat xizmatlari ko‘rsatish sifatining doimiy yaxshilab borilishi, tezkorligiva shaffofligi oshirilib borilishini anglatadi.
O‘zbekiston Respublikasi Adliya vazirligi huzuridagi Axborot-tahlil multimedia markazining emblemasi shaffoflik va rivojlanish ramzini anglatuvchi ko‘k-zumrad rangdan iborat multimedia sohasiga tegishli “Play” tugmasini o‘zida ifodalab, bu ommaviy axborot vositalarida axborotni to‘g‘ri, tezkor va sifatli yetkazishni anglatadi.
Emblemadagi yo‘llar multimedia markazi tomonidan yetkaziladigan media mahsulotlar xalqni adolat va haqiqat yo‘liga boshlashiga ishorani anglatadi.
Emblemadagi ko‘k-zumrad rangi faoliyatning shaffof ekanligini, shu bilan birga bilimlilik, ulug‘vorlikka da’vat qiluvchi, aholi bilan samimiy muloqotni uyg‘otuvchi rang hisoblanadi.
Izoh (0)