AQSh O‘rmon xo‘jaligi xizmati, O‘zbekiston o‘rmon xo‘jaligi davlat qo‘mitasi va Green World Future nodavlat tashkiloti hamkorlikda 13-sentabr kuni Toshkent viloyati Parkent tumanida joylashgan So‘qoq qo‘riqxonasida uch kunlik seminar tashkil etdi. Bu haqda AQShning O‘zbekistondagi elchixonasi matbuot xizmati “Daryo”ga xabar bermoqda.
O‘rmon xo‘jaligiga ixtisoslashgan amerikalik uch nafar mutaxassis – Liya Lord, Otom Ela va Metyu Fillips – parklarni rivojlantirishga oid xilma-xil mavzular, jumladan dam olish hududlarini rejalashtirish, loyihasini tuzish, yo‘lak-so‘qmoqlarni aniqlash, tabiat bilan yaqindan munosabatga kirishish, bu boradagi bilimni oshirish, sohaga jamoatchilikni jalb etish kabi masalalarga e’tiborni qaratdi.
So‘qoqda O‘zbekistonning turli burchaklaridan kelgan 20 dan ortiq mutaxassis yig‘ilib, tabiat qo‘ynida dam olish maskani yaratish sirlarini o‘rgandi. Ayni paytda So‘qoq qo‘riqxonasi kichik infratuzilmaga ega bo‘lib, u yerda qanday qilib tegishli park barpo etishni boshidan o‘rganib olish uchun barcha sharoit mavjud. “Biz Zomin, Ugam-Chotqol va boshqa milliy parklardan kelgan o‘zbekistonlik o‘rmonchi va soha mutaxassislari bilan ishlash va tajriba almashishdan juda mamnunmiz. Ular AQSh O‘rmon xizmati o‘z tasarrufidagi maskanlar boshqaruvini qanday yo‘lga qo‘ygani hamda olayotgan bilimlarini O‘zbekistonda ham tadbiq etishga katta qiziqish bildirishdi”, — deydi dastur boshqaruvchisi Liya Lord.
AQSh O‘rmon xizmati xalqaro dasturlari butun dunyoda o‘rmondan to‘g‘ri foydalanish va bioxilma-xillikni saqlab qolishda ko‘maklashadi. Qo‘shma Shtatlar innovatsion texnologiyani ishga tushirish, chegaralararo ekologik muammolarni hal etish hamda AQSh O‘rmon xo‘jaligi xizmati maxsus bilim va tajribalarini yanada chuqurlashtirish maqsadida mavjud imkoniyatlarni ishga solish uchun chet mamlakatlarda ham faoliyat olib boradi.
Izoh (0)